صدر مملکت ڈاکٹر عارف علوی کا ترکمانستان کے صدر  اور نو منتخب صدر  سے ٹیلیفونک رابطہ ہوا ہے۔

تفصیلات کے مطابق صدر مملکت ڈاکٹر عارف علوی کا ترکمانستان کے صدر گربانگولی بردی محمدوف اور نو منتخب صدر سردار بردی محمدوف سے ٹیلیفونک رابطہ ہوا جس میں انہوں نے دونوں رہنماوں کے ساتھ مختلف دوطرفہ امور پر بات چیت کی اورعلاقائی امن و استحکام کی صورتحال پر تبادلہ خیال کیا۔

ٹیلیفونک رابطے کے دوران صدر مملکت نے روابط بڑھانے، سیاحت میں اضافے اور عوامی روابط بڑھانے پر زور دیا جبکہ صدر عارف علوی نے ترکمانستان کو مشرق وسطیٰ اور باقی دنیا کے ساتھ تجارتی روابط کے لیے گوادر اور کراچی کی بندرگاہوں سے فائدہ اٹھانے کی پیشکش بھی کی۔

ڈاکٹر عارف علوی نے ترکمانستان کے صدر گربنگولی بردی محمدوف کو 12 مارچ 2022 کو صدارتی انتخابات کے کامیاب انعقاد اور انکے بیٹے سردار بردی محمدوف کی جیت پر مبارکباد پیش کی اور کہا یہ شاندار فتح ترکمانستان کے عوام کے موجودہ قیادت کے وژن پر اعتماد کی عکاسی کرتی ہے۔

صدر مملکت ڈاکٹر عارف علوی نے دسمبر 2021 میں اسلام آباد میں او آئی سی وزرائے خارجہ کی کونسل کے 17ویں غیر معمولی اجلاس میں ترکمانستان کی شرکت کو سراہا جبکہ انہوں نے ترکمانستان کے صدر گربانگولی بردی محمدوف کو دونوں ممالک کے درمیان سفارتی تعلقات کے قیام کی 30ویں سالگرہ پر مبارکباد دی۔

اس موقع پر نومنتخب صدر سردار بردی محمدوف سے گفتگو کرتے ہوئے صدر مملکت ڈاکٹر عارف علوی نے انہیں ترکمانستان کا صدر منتخب ہونے پر مبارکباد دی اور اس امید کا اظہار کیا کہ وہ دوطرفہ تعلقات کو نئی بلندیوں تک لے جائیں گے۔