پاکستان مسلم لیگ (ن) کی نائب صدر مریم نواز کا کہنا ہے کہ عمران خان پاکستان کے سب سے بڑے فتنے کا نام ہے، اسے جتنی جلدی ختم کردیں اتنا ہی ملک کے لیے بہتر ہوگا۔

گورنر ہاؤس لاہور میں حمزہ شہباز کی حلف برداری کے موقع پر مریم نواز نے کہا کہ موجودہ حکومت عوام کو محنت، اچھی نیت اور صلاحیت سے ریلیف دے گی۔

رہنما ن لیگ کا کہنا تھا کہ شہباز شریف اچھے ایڈمنسٹریٹر اور باصلاحیت وزیراعظم ہیں، وہ اپنی صلاحیتوں سے ملک کو درپیش چیلنجز پر جلد قابو پالیں گے، جسے پہلے پنجاب اسپیڈ کہتے تھے اب وہ پاکستان اسپیڈ بن گئی ہے۔

مسجد نبوی ﷺ میں ہونے والے واقعے پر مریم نواز نے کہا کہ یہ لوگ سیاسی دشمنی میں اتنا آگے بڑھ گئے کہ محبوب ہستی کے تقدس کا بھی لحاظ نہیں رکھا، یہ واقعہ انتہائی افسوس ناک ہے، اس سے دنیا بھر کے مسلمانوں کے جذبات مجروح ہوئے ہیں۔

مریم نواز نے کہا کہ مسجد نبوی ﷺ میں جو کچھ ہوا وہ سب منظم طریقے سے کیا گیا ہے۔عمران خان پاکستان کا سب سے بڑا فتنہ ہیں، اسے جتنی جلدی ختم کردیاجائے ، پاکستان کے لیے اتنا ہی بہتر ہوگا۔