پاکستان مسلم لیگ ن کے رہنما شاہد خاقان عباسی نے کہا ہے کہ ہم کوئی ریلیف نہیں مانگ رہے ہیں اور نہ ہمارا کوئی کیس نیب نے ختم کیا ہے۔

شاہد خاقان عباسی نے احتساب عدالت میں میڈیا سے بات چیت کرتے ہوئے کہا ہے کہ گزشتہ چار سال سے یہ کیس چل رہا ہے جس کی پیشی کے لئے ہم تو آتے ہیں لیکن کیس نہیں چلتا ہے۔

انہوں نے کہا کہ اس کیس میں نیب نا ثبوت پیش کرسکتی ہے نا گواہ پیش کرسکتے ہیں اس لئے اگر ثبوت ہے تو کیس چلائیں اور سزا دلوائیں جو کہ انصاف کا تواضع ہے۔

انہوں نے مزید کہا کہ 1100 ارب کے حساب جس نے لینے ہیں لے لے لیکن 150 کروڑ روپے کا وہ خود حساب دیدیں اور بھارتی اور اسرایئلی شہریوں سے آنے والی رقم کا کون حساب دیگا؟

مسلم لیگ ن کے رہنما نے کہا کہ ہزاروں لوگ نیب کے جھوٹے مقدمات میں جیل میں ہیں جس کے پیچھے پتہ نہیں نیب کے کونسے مقاصد ہیں لیکن نئے چیئرمین سے امید ہے کہ ناانصافی کو ختم کیا جائے اور یہ ان کی ذمہ داری ہے کہ وہ ان کیسیز کو ریویو کریں تاکہ جن کی زندگی مفلوج کردی ہے نیب نے ان کو ریلیف دیا جائے۔

ان کا کہنا تھا کہ نیب کے سابق چیئرمین اپنے اثاثے عوام کے سامنے رکھیں تاکہ عوام کو پتہ چلے جھوٹے مقدمات بنانے والے کی حقیقت کیا ہے۔

پیٹرولیم مصنوعات کی قیمتیں:

انہوں نے کہا ہے کہ تیل کی قیمتیں اوگرا کا نظام ہے، کسی کے بیانئے کا تیل کی قیمت پر اثر نہیں ہوتا ہے۔

انہوں نے بتایا کہ تیل کی قیمت حکومت طے نہیں کرتی  ہے اور نا ہی یہ مفتاح اسماعیل نے طے کرنا ہے، ہم تو چاہتے ہیں کہ ڈی ریگولیٹ کردیں تاکہ مارکیٹ قیمت خود طے کرے۔

بجلی کے متعلق بیان:

 شاہد خاقان عباسی نے کہا ہے کہ کے الیکٹرک حکومت پر بوجھ نہیں ڈالتی ہے، جتنی سستی بجلی بن سکتی تھی بنا رہے ہیں۔

انہوں نے بتایا کہ گزشتہ چار برسوں میں بجلی کی پیداوار میں کوئی اضافہ نہیں کیا گیا اور اس غفلت کا اثر کچھ وقت تک عوام پر رہے گا۔

سیاسی عدم استحکام:

ان کا کہنا تھا کہ پنجاب میں سیاسی کشیدگی کا فیصلہ عدالت نے کیا اور ہم نے تسلیم کیا لیکن آج کی سیاست میں دھمکیوں کی گنجائش نہیں ہے کیونکہ سیاسی کشیدگی کا اثر معیشت پر پڑتا ہے۔

انہوں نے کہا کہ رانا ثنا اللہ کو جے آئی ٹی کی طلبی بیوقوفی ہے لیکن اگر صوبائی حکومت وفاقی وزراء پر کیسز بنانا چاہتی ہے تو بنائے۔