پی ٹی آئی کے رہنما فیصل جاوید نے اسپتال میں سابق وزیراعظم عمران خان  سے ملاقات کے بعد سوشل میڈیا پر اس حوالے سے احوال بیان کیا ہے۔

سینیٹر فیصل جاوید نے بتایاکہ پی ٹی آئی چئیر مین عمران خان نے کہا ہے کہ آخری سانس تک قوم کے لیے جدوجہد جاری رکھیں گے۔

انہوں  نے اپنے ٹوئٹ میں کہا کہ اب سے کچھ دیر قبل عمران خان سے ملاقات ہوئی ہے، الحمدللہ ان کا آپریشن ہوگیا ہے اور وہ اللہ کے فضل سے تندرست ہیں، عمران خان کے جذبے کو سلام ہے۔

اب سے کچھ دیر پہلے عمران خان صاحب سے ملاقات ہوئی!الحمدللہ انکا آپریشن ہو گیا اور وہ اللہ کے فضل سے تندرست ہیں! انکے جذبے کو سلام! انھوں نے کہا کہ وہ آخری سانس تک اس قوم کے لئے اپنی جدوجہد جاری رکھیں گے! پوری قوم کی دعاؤں کا شکریہ! اللّٰہ پر ایمان۔۔مشکلات سے نکلے گا پاکستان

Advertisement

— Faisal Javed Khan (@FaisalJavedKhan) November 3, 2022

پی ٹی آئی رہنما نے مزید کہا کہ قوم کی دعاؤں کا شکریہ! اللہ پر ایمان، مشکلات سے نکلے گا پاکستان، عمران خان نے کہا ہے کہ وہ آخری سانس تک قوم کیلیے جدوجہد جاری رکھیں گے۔

حقیقی آزادی مارچ میں عمران خان پر قاتلانہ حملہ، سابق وزیراعظم سمیت 13 افراد زخمی

گزشتہ روز گوجرانوالہ میں لانگ مارچ کے دوران چیئرمین پی ٹی آئی کے کنٹینر پر فائرنگ کا واقعہ پیش آیا، جس کے نتیجے میں عمران خان اور پی ٹی آئی کے مرکزی رہنماؤں سمیت 13 افراد زخمی ہوگئے۔

ابتدائی اطلاعات کے مطابق فائرنگ کے اس واقعے کو عمران خان پر قاتلانہ حملہ قرار دیا گیا ہے، جس میں سینیٹر فیصل جاوید بھی شدید زخمی ہوئے ہیں جب کہ حامد ناصر چٹھہ کے صاحبزادے احمد چٹھہ اور چوہدری محمد یوسف بھی زخمی ہیں۔

یہ بھی پڑھیں؛ عمران خان پر قاتلانہ حملے کرنے والے شخص کا بیان سامنے آگیا

ذرائع نے بتایاکہ فائرنگ کے باعث عمران خان کی ٹانگ پر گولی لگی ہے جس کے باعث وہ معمولی زخمی ہوئے ہیں۔

سیکیورٹی اہلکاروں نے عمران خان کو کنٹینر کے اندر فوری طور پر نیچے محفوظ جگہ پر منتقل کیا۔

اس کے بعد انہیں کنٹینر سے نکال کر بلٹ پروف گاڑی میں طبی امداد کے لیے شوکت خانم اسپتال منتقل کیا گیا۔

ذرائع نے بتایا کہ عمران خان کا آزادی مارچ ایک سڑک سے گزر رہا تھا کہ اس دوران گلی سے ایک شخص نکلا اور کنٹینر کے قریب آکر فائرنگ کردی۔ فائرنگ کے واقعے کے بعد مارچ کے شرکاء میں بھگڈر مچ گئی۔

حملہ آور کو دیکھ کو پی ٹی آئی کارکن نے پستول پر ہاتھ مارا جس سے اس کا رخ بدل گیا اور کئی لوگ جسم کے نچلے حصوں پر گولیاں لگنے سے زخمی ہوئے۔

موقع پر موجود پی ٹی آئی کے کارکنوں نے ملزم کو پکڑ کر شدید تشدد کا نشانہ بنایا۔ پولیس نے حملہ آور کو گرفتار کرکے اسلحہ قبضے میں لے لیا۔

ویڈیو دیکھیں