پیپلزپارٹی کے رہنما قمر زمان کائرہ نے کہا ہے کہ عمران خان سے حکومت نہ لیتے تو ملک کو ناقابل تلافی نقصان ہوتا۔

وزیر اعظم کے مشیر قمر زمان کائرہ نے لالہ موسیٰ  میں افتتاحی تقریب سے خطاب کرتے ہوئے کہا کہ پیپلز پارٹی نے اپنے دور میں دہشتگردوں کیخلاف آپریشن کیے، دہشتگردی کے خلاف جنگ جیتیں گے، ادارے دہشتگردوں کا مقابلہ کررہے ہیں۔

انہوں نے کہا کہ ریاست کی رٹ چیلنج کرنے والوں کو کہا گیا بچھڑے ہوئے بھائی ہیں، آئین نہ ماننے والوں کو بھائی کیسے کہا جاسکتا ہے۔

قمرزمان کائرہ نے مہنگائی کا الزام عمران خان پر دھردیا

قمر زمان کائرہ نے کہا کہ عمران خان کے دور میں مہنگائی عروج پر تھی، عمران خان سیاست میں گالی گلوج اور بدتمیزی کا کلچر لائے۔

پیپلزپارٹی کے رہنما کا کہنا ہے کہ عمران خان کے جانے کے بعد دوبارہ دہشتگردی ہورہی ہے، انہوں نے دہشتگردوں کو کھلی چھوٹ دی۔

عمران خان نے سی پیک منصوبوں پر تاخیری حربے استعمال کیے

انہوں نے کہا کہ عمران خان نے سی پیک منصوبوں پر تاخیری حربے استعمال کیے، ان کے اقدامات سے چین ہم سے ناراض ہوا۔

قمر زمان کائرہ نے مزید کہا کہ عمران خان نے آتے ہی سی پیک پر حملے شروع کردیے، سی پیک کے تحت ترقی کے نئے راستے کھل رہے تھے۔

یہ بھی پڑھیں: عمران خان کو آئینی وقانونی طریقے سے روکیں گے، قمر زمان کائرہ

گزشتہ روز اپنے ایک بیان میں قمرزمان کائرہ نے کہا تھا کہ پرویزالہٰی کے اعتماد کا ووٹ کسی کی خواہش نہیں آئین اور قانون کی بات ہے، وزیراعلیٰ پنجاب دونوں سیاسی دھڑوں کے درمیان اپنی جگہ بنانے کے چکر میں ہیں پر ایسا ممکن نہیں، آئین کے مطابق وقت پر الیکشن ہوں گے۔

مشیر وزیراعظم برائے امور کشمیر و گلگت بلتستان کا کہنا تھا کہ معیشت کی صورتحال بہتر ہو گی تو الیکشن سے قبل وفاقی حکومت عوام کو بڑا ریلیف دینے میں کامیاب ہو گی۔

قمرزمان کائرہ نے کہا کہ ملک میں گندم اور آٹا دستیاب ہے اور اگر قلت ہے تو وفاقی حکومت ذمہ دار ہے ، تاجر ذخیرہ اندوزی کرکے آٹے کے ریٹ بڑھا رہے ہیں صوبائی حکومتوں کو اس پر ایکشن لینا چاہیے، پاکستان نے نہ کبھی ڈیفالٹ کیا ہے اور نہ ہی کرے گا۔