صدر مملکت ڈاکٹر عارف علوی نے کہا ہے کہ پاکستان کشمیریوں کے حق خودارادیت کے حصول تک ان کی حمایت جاری رکھے گا۔
تفصیلات کے مطابق صدر مملکت ڈاکٹر عارف علوی نے آزاد جموں و کشمیر کے ممبران قانون ساز اسمبلی اور سینئر سیاسی قیادت سے ملاقات کی۔
اس دوران صدر مملکت کا کہنا تھا کہ حکومت پاکستان اور پوری پاکستانی قیادت سیاسی وابستگیوں سے بالاتر ہو کر کشمیر کاز کے لیے پوری طرح پرعزم ہے، پاکستان کشمیریوں کے حق خودارادیت کے حصول تک کشمیریوں کی اخلاقی، سیاسی اور سفارتی حمایت جاری رکھے گا، آزادی کی تحریکوں اور دہشت گردوں کے درمیان واضح فرق ہے، کشمیری بہن بھائی آزادی کی ہر طرح سے منصفانہ جدوجہد کر رہے ہیں۔
کشمیری حق خودارادیت کے حصول کے لیے اپنی جانوں کا نذرانہ پیش کر رہے ہیں
ڈاکٹر عارف علوی نے کہا کہ کشمیری حق خودارادیت کے حصول کے لیے اپنی جانوں کا نذرانہ پیش کر رہے ہیں، افسوس کہ دنیا بھر میں مسلمانوں کی آزادی کی تحریکوں کو جان بوجھ کر، غلط اور بلا جواز طور پر دہشت گردی کی تحریکوں سے تشبیہ دی جاتی ہے، میڈیا انسانیت کے خلاف دنیا میں کہیں بھی ہونے والی کسی بھی ناانصافی کو دنیا تک پہنچانے کا سب سے موثر ذریعہ ہے۔
ان کا کہنا تھا کہ میڈیا کو کشمیریوں کے حق خودارادیت کی آواز اور امنگوں کو بلند کرنے کے لیے موثر طریقے سے استعمال کیا جانا چاہیے، میڈیا 5 اگست 2019 کے غیر قانونی اور غیر منصفانہ بھارتی اقدامات کو اجاگر کرے؛ بین الاقوامی میڈیا کو آزاد جموں و کشمیر میں کشمیریوں کو حاصل سیاسی، معاشی، سماجی، ثقافتی اور مذہبی آزادیوں کا موازنہ مقبوضہ جموں و کشمیر میں کشمیریوں پر ہونے والے ظلم، بربریت، تذلیل اور جبر سے کرنا چاہیے۔
ضرور پڑھیں؛ نیا چینی سال پاک چین تعلقات کے لیے یادگار ثابت ہوگا، صدر مملکت
انہوں نے کہا کہ ہمارے کشمیری بھائیوں نے لاتعداد قربانیاں دی ہیں، منصفانہ جدوجہد میں کشمیریوں کی قربانیاں رائیگاں نہیں جائیں گی، انشاء اللہ مستقبل قریب میں اپنا حق خودارادیت حاصل کر لیں گے، جموں و کشمیر تنازعہ بھارت نے اقوام متحدہ میں اٹھایا، اقوام متحدہ کی سلامتی کونسل کی متعدد قراردادوں میں استصواب رائے کا وعدہ کیا گیا، بدقسمتی سے عالمی سطح پر تنازعہ جموں و کشمیر کو دیگر تنازعات کے مقابلے میں مناسب اہمیت نہیں دی گئی۔
ملاقات کے دوران کشمیری قیادت کی جانب سے بھارتی قابض سیکیورٹی فورسز کی طرف سے مسلسل ڈھائے جانے والے مظالم کو بھی اجاگر کیا گیا۔
اس موقع پر آزاد جموں و کشمیر کے قائم مقام صدر انوار الحق، آزاد جموں و کشمیر کے وزیر اعظم سردار تنویر الیاس، سابق وزیر اعظم سردار عتیق احمد خان، آزاد جموں و کشمیر قانون ساز اسمبلی کے اراکین اور سینئر سیاسی قیادت موجود تھے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News