ترجمان دفتر خارجہ ممتاز زہرہ بلوچ نے کہا ہے کہ پاکستان کشمیر کی سیاسی، اخلاقی اور سفارتی حمایت جاری رکھےگا۔

تفصیلات کے مطابق اسلام آباد میں ہفتہ وار نیوز بریفنگ میں دفتر خارجہ کی ترجمان ممتاز زہرہ بلوچ نے کہا کہ سیکرٹری جنرل ایشین کوآپریشن ڈائیلاگ ڈاکٹر پورنچائی ڈینویواتھانا پاکستان میں ہیں اور سینئر حکام سے ملاقاتیں کر رہی ہیں۔

انہوں نے کہا کہ ان ملاقاتوں کے دوران پاکستان نے ایشیائی تعاون مذاکرات کے تمام رکن ممالک کے ساتھ کثیرالجہتی اور باہمی طور پر مفید تعلقات قائم کرنے کی اپنی خواہش کا اعادہ کیا ہے۔

ترجمان نے کہا کہ ڈائریکٹر جنرل انٹرنیشنل اٹامک انرجی ایجنسی رافیل گروسی آئندہ بدھ سے دو روز کے لیے پاکستان میں ہوں گے جہاں وہ صحت، توانائی، بجلی کی پیداوار اور صنعتی ترقی کے لیے جوہری ٹیکنالوجی استعمال کرنے والے مختلف اداروں کا دورہ کریں گے۔

یہ بھی پڑھیں: پاکستان کی بھارت سے متعلق پالیسی واضح ہے، ترجمان دفتر خارجہ

انہوں نے کہا کہ یہ دورہ سماجی و اقتصادی ترقی کے لیے جوہری ٹیکنالوجی کے پرامن استعمال کے لیے تعاون کو آگے بڑھانے کے راستے تلاش کرنے کا موقع فراہم کرے گا۔

بھارت کے غیر قانونی طور پر مقبوضہ جموں و کشمیر میں جاری صورتحال کے بارے میں ترجمان نے کہا کہ بھارت کشمیریوں کو ان کی سرزمین سے بے دخل کرنے کے لیے مقبوضہ علاقے میں بے دخلی کی مہم چلا رہا ہے۔

انہوں نے کہا کہ ایسا کوئی عمل کشمیری عوام کو زیر نہیں کر سکتا اور پاکستان حق خودارادیت کی ان کی منصفانہ جدوجہد میں ان کی حمایت جاری رکھے گا۔

زلزلے کے بعد ترکی اور شام کی صورتحال کے بارے میں ترجمان نے کہا کہ ہم وہاں کے حکام سے رابطے میں ہیں اور ابھی تک پاکستانی شہریوں کے کسی جانی نقصان کی کوئی اطلاع نہیں ہے۔