سابق  وزیراعظم اور پاکستان مسلم لیگ ن کے سینئر رہنما شاہد خاقان عباسی نے کہا ہے کہ میں مسلم لیگ میں ہوں، کہیں نہیں جارہا۔

تفصیلات کے مطابق سابق وزیر اعظم شاہد خاقان عباسی نے میڈیا سے گفتگو کرتے ہوئے کہا کہ اس ملک میں  احتساب کی سرکس جاری ہے ۔

انہوں نے کہا کہ فواد حسن فواد پر ایک جھوٹا مقدمہ بنایا گیا، ایک جھوٹا ریفرنس تیار کیا گیا  جس کو اس وقت کے چیئرمین نیب نے منظور کیا  تھا جس میں فواد حسن فواد کے پورے خاندان کو شامل کیا گیا تھا۔

انہوں نے بتایا کہ نیب کے پاس فواد حسن فواد کے خلاف کوئی ثبوت نہیں تھا لیکن پھر بھی ریکارڈ میں غیر قانونی ترمیم کر کے  یہ ثابت کرنے کی کوشش کی گئی کہ انہوں نے اپنی آمدن سے زائد اثاثے بنائے ہیں جبکہ حقیقت یہ تھی کہ کوئی اثاثہ ان کے نام نہیں تھا۔

یہ بھی پڑھیں: پارٹی کے عہدے سے استعفیٰ دیا ہے، میں پارٹی کے ساتھ ہوں، شاہد خاقان عباسی

انہوں نے بتایا کہ نیب کے انصاف کا عالم یہ ہے کہ فواد حسن فواد کا مقدمہ جس عدالت میں تھا وہاں جج ہی تیعنات نہیں تھا  جس کی وجہ سے انہوں نے 16 ماہ جیل میں گزارے ۔

شاہد خاقان عباسی کا کہنا تھا کہ عمران خان انصاف کے دعوے کرتا تھا اور اس مقصد کے لئے انہون نے 3 مشیر رکھے ہوئے تھے، وہ آج یہ کہتا ہے کہ میں نہیں کرتا تھا مجھ سے کروایا جاتا تھا جبکہ سابق چیئرمین نیب سے پوچھا جائے تو وہ رو رو کر کہتے ہیں کہ میں مجبور تھا، مجھے حکومت بلیک میل کر کے کام کرواتی تھی ۔

ان کا کہنا تھا کہ یہ جو تماشے لگے ہیں اس کا اثر لوگوں کی زندگیوں پر پڑا ہے، یہ تلخ حقائق ہیں اس ملک کے انصاف کے نظام کے جس کو درست کرنے کی ضروت ہے۔

انہوں نے کہا کہ میں پہلے بھی کہہ چکا ہوں اور بتا بھی چکا ہوںکہ جب تک نیب کو ختم نہیں کیا جائیگا ، پاکستان کی حکومت نہیں چلے گی۔

خیال رہے کہ احتساب عدالت میں سابق وزیر اعظم شاہد خاقان عباسی و دیگر کیخلاف ایل این جی ریفرنس کی عماست ہوئی۔

سماعت کے آگاز پر عظمیٰ عادل کے وکیل شعیب رزاق نے دلائل دینا شروع کئے اور کہا کہ دیکھنا یہ ہوگا کہ عدالت کون سے متعلقہ فورم کو یہ ریفرنس بھیج سکتی ہے۔

انہوں نے بتایا کہ اسلام آباد ہائیکورٹ کے دورکنی بینچ کے فیصلے میں ایک قانونی سقم ہے جس پر عدالت کا کہنا تھا کہ اسلام آباد ہائیکورٹ کے فیصلے میں قانونی سقم کو اس فورم پر نہیں زیر بحث لایا جاسکتا۔

شعیب رزاق کا کہنا تھا کہ قانونی سقم کو زیر بحث لاسکتے ہیں، عدالت نے کہا ریفرنس متعلقہ فورم کو بھیجا جائے جبکہاس کیس میں کوئی فورم ہی نہیں تو پھر کہاں جائیں گے۔