وزیر اطلاعات و نشریات مریم اورنگزیب نے کہا ہے کہ عمران خان ناکام ہو چکے ہیں، توشہ خانہ سے متعلق جواب دیں، توشہ خانہ سے چیزیں لینا اور چوری کرنا مختلف باتیں ہیں۔

وفاقی وزیر مریم اورنگزیب نے میڈیا سے گفتگو کرتے ہوئے کہا کہ الیکشن کمیشن کو دھمکیاں دینے والے آج معافی مانگ رہے ہیں۔

عمران خان نے جرم نہیں کیا تو عدالت میں جواب دیں

انہوں نے کہا کہ راجہ شکیل کی گاڑی میں ظل شاہ کو لے جایا گیا، راجہ شکیل کو پناہ دی گئی، ڈرائیور فرار ہوگیا۔

مریم اورنگزیب نے کہا کہ عمران خان نے جرم نہیں کیا تو عدالت میں جواب دیں، ظل شاہ کی لاش پر سیاست کی گئی، سائفر، لانگ مارچ، عدلیہ تحریک ختم، اب کیا بیچو گے؟

عمران خان کی گندی سیاست اب دفن ہوچکی ہے

انکا کہنا ہے کہ عمران خان کی گندی سیاست اب دفن ہوچکی ہے، اقتدار جانے کے بعد سازش کا ڈرامہ رچایا گیا، عمران خان دور میں ملکی معیشت تباہ ہوئی، انہوں نے اقتدار بچانے کے لیے سابق آرمی چیف کی منتیں کیں۔

یہ بھی پڑھیں: دوہرے نظام پر اُٹھنے والے سوالات کا جواب دینا ہوگا، مریم اورنگزیب کا عدلیہ پر وار

وفاقی وزیر نے کہا کہ عمران خان عدالتوں پر حملہ آور ہوتے ہیں، پیش نہیں ہوتے۔ لاہور میں عمران خان نے پھر سیاست کرنے کی کوشش کی، منی ریلی میں عمران خان بلٹ پروف گاڑی میں بیٹھے رہے۔

مریم اورنگزیب نے مزید کہا کہ عمران خان نے 4سال ملک کیخلاف سازش کی، انہوں نے آئی ایم ایف کا پروگرام معطل کیا، موجودہ حکومت نے آئی ایم ایف پروگرام دوبارہ بحال کیا، وزیر اعظم آئی ایم ایف سے معاملات طے کر کے ٹیبل پر لائے۔