اسلام آباد: ترجمان دفتر خارجہ ممتاز زہرا بلوچ نے کہا ہے کہ غیر قانونی تارکین وطن کے خلاف پاکستان میں جاری آپریشن کسی مخصوص قومیت کے خلاف نہیں ہے۔

دفتر خارجہ کی ترجمان ممتاز زہرا بلوچ نے صحافیوں کو ہفتہ وار بریفنگ دیتے ہوئے کہا کہ پاکستان کی افغان مہاجرین کے حوالے سے قومی پالیسی میں کوئی تبدیلی نہیں آئی، ہم 1.4 ملین افغان مہاجرین کی مہمان نوازی جاری رکھے ہوئے ہیں۔

انہوں نے کہا کہ پاکستان کا تازہ فیصلہ افغان مہاجرین کے خلاف نہیں ہے، یہ فیصلہ ان افغانوں کے حوالے سے ہے جو کہ غیر قانونی طور پر پاکستان میں مقیم ہیں، کارروائی توسیع ویزا اور ضروری دستاویزات کے بغیر یہاں مقیم افغانیوں کے حوالے سے ہے۔

ترجمان نے کہا کہ پاک افغان باہمی تجارت بند نہیں ہوئی یہ بے بنیاد رپورٹس ہیں، پاکستان افغانستان ٹرازنزٹ ٹریڈ جاری ہے پاکستان اس ٹرانزٹ ٹریڈ کے غیر قانونی استعمال کو روکنے کے لیے اقدامات کر رہا ہے۔

انکا کہنا ہے کہ نگران وزیر خارجہ اس وقت چین میں موجود ہیں، وہ ٹرانس ہمالیہ کانفرنس میں شرکت کر رہے ہیں، وہ چینی وزیر خارجہ وانگ ژی کی دعوت پر چین روانہ ہوئے ہیں۔

ممتاز زہرا بلوچ نے کہا کہ آج صبح نگران وزیر خارجہ نے کانفرنس سے خطاب کیا اور انہوں نے چینی وزیر خارجہ سے باہمی ملاقات بھی کی ہے جس میں سی پیک اور باہمی تزویراتی رابطوں کے حوالے سے تبادلہ خیال کیا گیا۔ پاکستان اوت ناروے کے درمیان باہمی سیاسی مشاورت کا تیسرا دور گذشتہ روز اسلام آباد میں منعقد ہوا۔

دفتر خارجہ کی ترجمان نے کہا کہ تبت چین میں بڑی کانفرنس کی سائیڈ لائنز پر ملاقاتوں کا سلسلہ جاری ہے۔ ہمارے ساتھ الیکشن کمشن آف پاکستان کی جانب سے رابطے کیے گیے ہیں، یہ رابطے غیر جانبدار انتخابی مبصرین کو پاکستان بلانے کے حوالے سے ہیں۔

انہوں نے کہا کہ عالمی کپ میں پاکستانیوں کو ویزوں کے اجراء کے حوالے سے بھارت سے رابطے میں ہیں، امید کرتے ہیں کہ پاکستانیوں کو عالمی کپ کرکٹ کے حوالے سے ویزے جاری کیے جائیں گے۔

ممتاز زہرا بلوچ نے کہا کہ بھارت سیاست کو کھیلوں کے ساتھ مکس نہ کرے، بطور میزبان ملک بھارت کو پاکستانی شائقین کے عالمی کپ کے دیکھنے کے حوالے سے رکاوٹیں نہ ڈالے۔

ترجمان نے کہا کہ پاکستانی ٹیم بھارت میں باہمی سیریز کھیلنے کے لیے نہیں گئی، بلکہ اس نے ایک عالمی کپ کے لیے کوالیفائی کیا ہے۔

انہوں نے مزید کہا کہ فلسطین کے حوالے سے پاکستان کا موقف نہایت واضح ہے، ہم 1969 سے پیشگی سرحدوں اور الودس بطور دارلحکومت فلسطینی ریاست کے قیام کو مسئلہ فلسطین کا حل سمجھتے ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے یوٹیوب چینل کو سبسکرائب کریں  https://bit.ly/3Tv8a3P اور بیل آئیکن پر کلک کریں