بیجنگ: چینی اسکالرز اور محقیقین نے سی پیک کو بی آر آئی کے تحت پاکستان اور چین کے مابین بہترین شراکت داری قرار دے دیا۔

تفصیلات کے مطابق نگران وزیرِ اعظم انوار الحق کاکڑ نے سی پیک پر منعقدہ راؤنڈ ٹیبل اجلاس کی صدارت کی جس میں انہوں نے پاکستان کے علاقائی روابط اور پائیدار ترقی کے فروغ کے ویژن کا اظہار کیا۔

اجلاس میں گزشتہ دس برس میں پاکستان کی سماجی و اقتصادی ترقی میں سی پیک کے مثبت کردار پر بھی روشنی ڈالی گئی۔

نگران وزیرِ اعظم نے سی پیک کے پاک چین دیرینہ دوستی اور اسٹریٹیجک شراکت داری میں کلیدی کردار کی اہمیت پر زور دیا اور کہا کہ پاک چین دوستی باہمی تعاون اور احترام پر مبنی ہے۔

اجلاس میں انوار الحق کاکڑ نے کامیابیوں، حاصل شدہ اسباق اور آئندہ کے ترقیاتی منصوبوں کیلئے لائحہ عمل پر بھی گفتگو کی اور کہا کہ چین اور پاکستان نے سی پیک کو خوشحالی، روزگار، روابط اور گرین ڈیویلپمنٹ پر مشتمل راہداری میں بدلنے پر اتفاق کیا ہے۔

اس موقع پر چینی اسکالرز اور محقیقین نے سی پیک کو بی آر آئی کے تحت پاکستان اور چین کے مابین بہترین شراکت داری قرار دیا۔

نگران وزیر اعظم نے پاکستان کے خصوصی سرمایہ کاری زونز میں سرمایہ کاری کی گہری دلچسپی کو خوش آئند قرار دیا۔

راؤنڈ ٹیبل اجلاس میں چینی اسکالرز، تعلیمی اداروں و تھنک ٹینکس کے محقیقین نے شرکت کی۔

نگران وزیراعظم کی گفتگو

اجلاس سے قبل نگران وزیر اعظم انوارالحق کاکڑ نے چین کے تھنک ٹینک اور اسکالرز سے گفتگو کرتے ہوئے کہا تھا کہ پاکستان اور چین کی دوستی ہر موقع پر ثابت قدم رہی۔

انہوں نے کہا تھا کہ سی پیک بلوچستان کےعوام کی ترقی اور خوشحالی کا مینار ہے، منصوبوں سے نوجوانوں کو ترقی کے مواقع ملیں گے، سی پیک نے پاکستان کے بنیادی ڈھانچے کو جدید بنایا، سی پیک دونوں ممالک کے بڑھتے اقتصادی و تجارتی تعلقات کی علامت ہے۔

نگران وزیر اعظم کا کہنا تھا کہ سی پیک نے پسماندہ طبقے کی سماجی، اقتصادی ترقی کی راہ ہموار کی۔ چین اور پاکستان کیلئے گوادر کو علاقائی روابط کا مرکز بنانا چاہتے ہیں۔

انہوں نے مزید کہا تھا کہ سی پیک کی بدولت گزشتہ 10سال میں پاکستان کا منظرنامہ تبدیل ہوا، کسی کو چین سے گہرے تعلقات متاثر نہیں کرنے دیں گے، پاکستان کیلئے چین سے تعلقات سے زیادہ کوئی رشتہ اہم نہیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں