اسلام آباد: پاکستان کو عالمی مالیاتی فنڈ (آئی ایم ایف) سے تقریباً 70 کروڑ ڈالرز ملنے کا امکان ہے۔

تفصیلات کے مطابق آئی ایم ایف ایگزیکٹیو بورڈ کا اجلاس آج واشنگٹن میں ہوگا، جس میں آئی ایم ایف بورڈ پاکستان کیلئے اسٹینڈ بائی ارینجمنٹ کے تحت قرض کی منظوری دے گا۔

قرض منظوری کے بعد پاکستان کو 70 کروڑ ڈالر کی دوسری قسط ملے گی۔

آئی ایم ایف اور پاکستان کے درمیان اسٹاف سطح معاہدہ 15 نومبر کو ہوا تھا جبکہ آئی ایم ایف جائزہ مشن تیسرے جائزے کیلئے فروری میں پاکستان آئے گا۔

واضح رہے کہ پاکستان آئی ایم ایف کے موجودہ پروگرام کے بعد ایک اور پروگرام بھی لے گا، نگران حکومت نے عالمی مالیاتی فنڈ (آئی ایم ایف) کے آئندہ پروگرام لینے کیلئے مشاورت شروع کر دی ہے۔

اس حوالے سے حکام وزارت خزانہ نے بتایا تھا کہ نگران حکومت کے طے شدہ اقدامات منتخب حکومت آگے بڑھائے گی، نئی منتخب حکومت کو اقتدار میں آتے ہی آئی ایم ایف پروگرام پر دستخط کرنا ہوگا۔

حکام کا کہنا تھا کہ فروری میں عام انتخابات کے بعد آنے والی حکومت نئے پروگرام پر عملدرآمد کرے گی، معیشت کی مکمل بحالی کیلئے آئی ایم ایف کا ایک اور پروگرام ناگزیر ہے ۔

منتخب حکومت مالی سال 2024,25 کیلئے بجٹ پر کام کا آغاز کرے گی، مالی سال 2024,25 کا بجٹ آئی ایم ایف کے نئے پروگرام کے تحت ترتیب دینا ہوگا اور نئی حکومت کے اقتدار سنبھالنے کے بعد آئندہ بجٹ کی تیاری کیلئے چار ماہ کا وقت ہوگا۔

حکام نے مزید بتایا تھا کہ آئی ایم ایف کے ساتھ ایک اور پروگرام موجودہ اقدامات کے بعد معیشت کو مضبوط کرے گا، معیشت کی مکمل بحالی کیلئے لانگ ٹرم پالیسی کے تحت اقدامات کا تسلسل جاری رکھا جائے گا۔