اسلام آباد: پاکستان نے بشام میں دہشت گردانہ حملے کے ذمہ داروں، سہولت کاروں اور معاونت کرنے والوں کو انصاف کے کٹہرے میں لانے کے عزم کا اعادہ کیا ہے۔

دفتر خارجہ کی ترجمان ممتاز زہرہ بلوچ نے ہفتہ وار نیوز بریفنگ دیتے ہوئے کہا کہ یہ حملہ پاک چین دوستی کے دشمنوں نے ترتیب دیا ہے، ایسی کوششیں کامیاب نہیں ہوں گی اور ہم سی پی ای سی کی ترقی اور تعاون کو فروغ دینے کے لیے مل کر کام کرتے رہیں گے۔

انہوں نے کہا کہ پاکستان کسی بھی طاقت کو دونوں ممالک کے درمیان تعلقات کو سبوتاژ کرنے کی اجازت نہیں دے گا۔ پاکستان اور چین گہرے دوست اور آہنی بھائی ہیں، دونوں ممالک مل کر ان عناصر کے خلاف بھرپور کارروائی کریں گے اور انہیں شکست دیں گے۔

ممتاز زہرہ بلوچ نے کہا کہ پاکستان چینی بھائیوں کے ساتھ مل کر پاکستان میں چینی شہریوں، منصوبوں اور اداروں کے تحفظ کو یقینی بنانے کے لیے کام جاری رکھے گا، پاکستان نے چینی شہریوں کی سیکیورٹی میں مزید اضافہ کیا ہے۔

ایک سوال کے جواب میں ترجمان نے کہا کہ پاک بھارت تجارتی تعلقات 2019 سے غیر موجود ہیں جب بھارت نے غیر قانونی طور پر مقبوضہ جموں و کشمیر میں غیر قانونی اقدامات کیے تھے، اس موقع پر پاکستان کے موقف میں کوئی تبدیلی نہیں آئی۔

ممتاز زہرہ بلوچ نے نشاندہی کی کہ بھارتی قابض حکام مبینہ طور پر غیر قانونی طور پر مقبوضہ جموں و کشمیر میں دریافت ہونے والے لیتھیم وسائل کے کچھ بلاکس کو نیلام کرنے کے لیے تیار ہیں۔

ترجمان کا کہنا تھا کہ ایسے خدشات ہیں کہ خطے سے باہر کی کارپوریشنوں کو اس قیمتی وسائل سے فائدہ اٹھانے کے ٹھیکے دیے جائیں گے جو کشمیری عوام کا ہے، قابض حکام کی طرف سے کشمیریوں کو قدرتی وسائل پر ان کے حق سے محروم کرنے کے یہ اقدامات غیر قانونی اور استحصالی ہیں۔

انہوں نے بھارت پر زور دیا کہ وہ اس طرح کے استحصالی منصوبوں کو ترک کرے اور اپنی زمین اور قدرتی وسائل پر کشمیریوں کے حق کا احترام کرے۔

ممتاز زہرہ بلوچ نے غزہ میں جاری اسرائیلی جارحیت پر تحفظات کا اظہار کرتے ہوئے کہا کہ اقوام متحدہ کی سلامتی کونسل کی قرارداد میں فوری جنگ بندی کا مطالبہ کیا گیا ہے۔

ترجمان دفتر خارجہ نے مزید کہا کہ اسرائیل کو اس کے حامیوں کی طرف سے فلسطینیوں کا قتل عام بند کرنے، غیر انسانی محاصرہ ختم کرنے اور غزہ کے تمام حصوں میں انسانی امداد کی اجازت دینے پر زور دینا چاہیے۔