ملتان ایئرپورٹ پر فیڈرل انوسٹیگیشن ایجنسی (ایف آئی اے) امیگریشن نے پاکستان کی تاریخ کی سب سے بڑی سونے کی اسمگلنگ ناکام بنادی۔
ایف آئی اے حکام نے ملتان انٹرنیشل ایئرپورٹ پر کارروائی کرتے ہوئے بیرون ملک جانے والے مسافر کے سامان سے 10 سونے کی سلیب برآمد کرلیں۔
ترجمان ایف آئی اے نے بتایا کہ ایئرپورٹ پر مسافر کے سامان سے 16 کلو سونا برآمد کر لیا گیا ہے، برآمد ہونے والے سونے میں مختلف وزن کی 10 اینٹیں شامل ہیں جبکہ سونے کی سلیب کا کل وزن 16 کلو گرام ہے۔
ایف آئی اے کے ترجمان کا کہنا تھا کہ ملزم محمد تنویر فلائی دبئی کی پرواز نمبر ایف زیڈ 340 کے ذریعے دبئی جا رہا تھا، ملزم نے امیگریشن کلیرنس کے لیے اپنا پاسپورٹ کاؤنٹر پر پیش کیا، ملزم دوران امیگریشن پوچھے گئے سوالات پر حکام کو مطمئن نہ کر سکا۔
ترجمان کے مطابق بار بار ٹریول کرنے پر ملزم کے سامان کو چیکنگ کے لئے منگوایا گیا، دوران تلاشی ملزم کے سامان سے 16 کلو گرام سونا برآمد کر لیا گیا، ملزم کا سامان تمام متعلقہ اداروں سے کلیئر ہونے کے بعد چیک کیا گیا جبکہ ملزم نے بیگ کے خفیہ خانوں میں سامان چھپایا ہوا تھا۔
ایف آئی اے کے ترجمان نے مزید بتایا کہ گرفتار ملزم کے خلاف تحقیقات کا دائرہ وسیع کر دیا گیا ہے، ملزم کی معاونت کرنے والے عناصر کے حوالے سے بھی تحقیقات کی جا رہی ہیں اور ملزم کو مزید قانونی کارروائی کے لئے ایف آئی اے کمپوزٹ سرکل ملتان کے حوالے کیا جا رہا ہے جبکہ دوران تفتیش مزید گرفتاریاں بھی متوقع ہیں۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News