مظفرآباد: تحریک آزادی کشمیر کے عظیم کمانڈر برہان مظفر وانی کا آج آٹھواں یوم شہادت منایا جارہا ہے۔

سیز فائر لائن کے دونوں اطراف کشمیری عوام عظیم رہنما کو خراجِ عقیدت پیش کرنے کیلئے “یوم مزاحمت” کے طور پر منا رہے ہیں۔

برہان وانی 8 جولائی 2016 کو کوکرناگ علاقے میں بھارتی فوجیوں کیخلاف دادِ شجاعت دیتے ہوئے شہید ہوئے تھے۔ برہان وانی شہید کو خراج عقیدت پیش کرنے کیلئے پاسبان حریت جموں کشمیر کے زیر اہتمام آزاد کشمیر بھر میں ریلیوں کا انعقاد کیا جا رہا ہے۔

پاسبان حریت جموں کشمیر کے زیرِ اہتمام دارالحکومت کے ختم نبوت چوک چھتر میں ایک پروقار تقریب کا انعقاد کیا گیا اور 313 کشمیری نوجوانوں کے ایک منظم دستے نے برہان وانی اور شہدائے جموں کشمیر کو سلامی پیش کی۔

کشمیری نوجوانوں نے قومی ترانوں پر پاکستان اور آزاد جموں کشمیر کے پرچموں کو بھی سلامی پیش کی اور بھارت کے زیرِ قبضہ جموں کشمیر کی آزادی کے لئے مزاحمت کا حلف بھی لیا اور آزادی کشمیر کے لئے پُرجوش نعرے بلند کیے۔

کشمیری نوجوان “بھارت سے لیں گے آزادی، ہے حق ہمارا آزادی، کشمیری مزاحمت زندہ باد زندہ باد، جس کشمیر کو خون سے سینچا وہ کشمیر ہمارا ہے، یہ جنگ ہے جنگ آزادی، برہان تیرے خون سے انقلاب آئے گا” جیسے لگا رہے تھے، کشمیر نوجوانوں نے “پاکستان سے رشتہ کیا لا الہ الاالہ ” کے فلک شگاف نعرے لگائے۔

بعدازاں پاسبان حریت کے زیرِ اہتمام مقبوضہ کشمیر کی آزادی کے عزم کیلئے نوجوانوں کے درمیان “دوڑو آزادی کیلئے” دوڑ کے مقابلے کا انعقاد بھی کیا گیا، جس میں 313 کشمیری نوجوانوں نے حصہ لیا۔