وزیر اعلیٰ پنجاب مریم نواز شریف ہیرو کی پذیرائی  کے لیے خودمیاں چنوں کی نواحی گاؤں میں اولپمیئن ارشد ندیم کے گھر پہنچ گئیں۔

تفصیلات کے مطابق 101 پندرہ ایل میں وزیر اعلیٰ  پنجاب مریم نواز شریف کی آمد پر اولمپیئن ارشد ندیم اور اہل خانہ نے ان کا پر خلوص استقبال کیا۔

مریم نواز شریف نے گھر کے اندر خود جاکر  ارشد ندیم کے اہل خانہ سے ملاقات کی اور مبارکباد دی۔

وزیر اعلیٰ مریم نواز شریف نے ارشد ندیم کی والدہ محترمہ رضیہ پروین کو گلے لگا کر  مبارکباد پیش کی اور انہیں اپنے ساتھ بٹھا کر کافی دیر باتیں کرتی رہیں۔

مریم نواز شریف نے اہل خانہ کے ساتھ تصاویر اور سیلفیاں  بھی بنوائیں۔

المپیئن ارشد ندیم نے اولمپکس مقابلوں کی یاد تازہ کی اور اپنی کاوش سے انہیں آگاہ کیا۔

وزیر اعلیٰ پنجاب مریم نواز شریف نے اولمپیئن ارشد ندیم کو 10 کروڑ روپے کا چیک اور  ہنڈا سوک کا ر’پی اے کے 92.97‘کی چابی پیش کی۔

مریم نواز نے کوچ سلمان اقبال بٹ کو بھی پچاس لاکھ روپے کا چیک دیا اور  انہیں شاباش دی۔

وزیر اعلیٰ پنجاب نے کہا کہ ارشد ندیم نے قوم کو بے مثال خوشی سے ہمکنار کیا ہے۔

اولپمیئن ارشد ندیم اور ان کے والدین نے وزیر اعلیٰ کی آمد کو عزت افزائی قرار دیا۔

اس موقع پر  سینئر منسٹر مریم اورنگزیب ،  وزیر کھیل فیصل ایوب کھوکھر ،معاون خصوصی ذیشان ملک ،ایم پی اے ثانیہ عاشق، عامر حیات ہراج، پیر اسلم بودلہ ،چیف سیکرٹری ، اے سی ایس ساؤتھ ،اے آئی جی ساؤتھ،سیکرٹری اسپورٹس،کمشنر ، آر پی او ، ڈپٹی کمشنر ، اور دیگر بھی موجود تھے۔