اسلام آباد: ذرائع ایف ابی آر کے مطابق چیئرمین کی تعیناتی کے لئے ایف بی آر کے درجنوں سینئر افسران کو نظرانداز کردیا گیا۔

ذرائع ایف بی آر کا کہنا ہے کہ فیلڈ میں 24 اور ہیڈکوارٹرز میں 6 افسران نئے چیئرمین ایف بی آر سے سینئر ہیں، ممبر کسٹمز آپریشنز طویل چھٹیوں پر روانہ اور سینئر افسران بھی نالاں ہیں۔

ذرائع نے بتایا کہ دیگر اہم اداروں کی طرز پر ایف بی آر چیئرمین کی تعیناتی کے لئے سنیارٹی مکینزم موجود نہیں، گریڈ 21 کے افسر اور ممبر کسٹمز آپریشنز اشہد جواد طویل چھٹیاں لے چکے ہیں۔

ذرائع نے کہا کہ امجد زبیر ٹوانہ سے پہلے عاصم احمد، ڈاکٹر اشفاق کو بھی سینئرز پر فوقیت دی گئی ہے، 11 ماہ کے دوران ایف بی آر کو تقریبا 12 ہزار 9 سو ارب روپے تک اکٹھے کرنا ہوں گے۔

ذرائع ایف بی آر کہتا ہے نئے چیئرمین کی تعیناتی پر ایف بی آر بورڈ اور ٹیم میں تبدیلیوں کا امکان ہے، ایک یا دو ماہ ریونیو ہدف میں شارٹ فال آیا تو ہدف حاصل کرنا مشکل ہوگا۔

ذرائع نے مزید کہا کہ چیئرمین کو ٹریک اینڈ سسٹم، ڈیجیٹائزیشن، ایف بی آر ریونیو ٹارگٹ کے مسائل ہوں گے جب کہ عالمی اداروں سے ڈیل، ٹیکس نیٹ وسیع کرنا، تاجروں کو ٹیکس نیٹ میں لانا چیلنج ہوگا۔