کوئٹہ: بلوچستان کے علاقے گڈالر اور پیرو کنری کے درمیان کوئٹہ سے پشاور جانے والی جعفر ایکسپریس پر شدید فائرنگ کی اطلاعات موصول ہوئی ہیں۔

بلوچستان حکومت کے ترجمان شاہد رند کے مطابق جعفر ایکسپریس پر فائرنگ کے بعد سبی اسپتال میں ایمرجنسی نافذ کر دی گئی ہے تاکہ زخمیوں کو فوری علاج فراہم کیا جا سکے۔

اس کے علاوہ ایمبولینسز کو جائے وقوعہ کی جانب روانہ کر دیا گیا ہے تاہم پہاڑی اور دشوار گزار علاقے کے باعث امدادی ٹیموں کو وہاں تک پہنچنے میں مشکلات کا سامنا ہے۔

ترجمان نے بتایا کہ محکمہ ریلوے کی جانب سے امدادی ٹرین بھی روانہ کردی گئی ہے تاکہ واقعے کے مقام پر فوری طور پر امدادی کارروائیاں کی جاسکیں۔

اس کے علاوہ سیکورٹی فورسز بھی علاقے کی طرف روانہ ہوچکی ہیں تاکہ صورت حال کو قابو میں لایا جا سکے اور مزید کسی ناخوشگوار واقعے سے بچا جاسکے۔

ابتدائی طور پر اس واقعے کی نوعیت اور اس میں دہشت گردی کے ممکنہ پہلوؤں کا جائزہ لیا جا رہا ہے۔

شاہد رند نے بتایا کہ واقعے کی ابتدائی تحقیقات میں یہ بات سامنے آئی ہے کہ یہ حملہ ممکنہ طور پر دہشت گردی کا شاخسانہ ہوسکتا ہے۔ حکام اس معاملے کی تحقیقات میں مصروف ہیں تاکہ واقعے کی وجوہات اور اس کے پیچھے چھپے مقاصد کا پتا چلایا جا سکے۔

بلوچستان حکومت نے اس واقعے کے بعد ہنگامی اقدامات کی ہدایت کی ہے اور تمام متعلقہ ادارے اس وقت متحرک ہیں۔ ترجمان نے عوام سے اپیل کی ہے کہ وہ پرامن رہیں اور افواہوں پر کان نہ دھریں۔