آپریشن بنیان مرصوص میں دشمن کو منہ توڑ جواب دینے اور معرکہ حق میں تاریخی فتح پر آج ملک بھر میں یوم تشکر منایاجارہا ہے۔

 ملک بھر میں فجر کی نماز کے بعد قرآن خوانی کی گئی جس میں مسلح افواج اور ملک کے لیے خصوصی دعائیں کی گئیں۔

دن کا آغاز وفاقی دارالحکومت میں 31 توپوں کی سلامی سے ہوا جبکہ صوبائی دارالحکومتوں میں 21،21 توپوں کی سلامی دی گئی، اس  دوران فضا “اللہ اکبر” اور “پاکستان زندہ باد” کے نعروں سے گونج اٹھی۔

یوم تشکر کے موقع پر ملک بھر میں پرچم کشائی کی تقاریب منعقد ہوں گی، اس کے علاوہ  شہداء کی قبروں پر حاضری دی جائے گی۔

یہ بھی پڑھیں: بنیان مرصوص؛ پاک فوج کا دشمن کے ٹھکانوں پر فتح 1 اور 2 میزائل سسٹم سے حملے کی ویڈیو منظر عام پر

کراچی میں مزار قائد پر یوم تشکر کے موقع پر گارڈز کی تبدیلی کی پروقار تقریب کا انعقاد کیا گیا جس میں کور کمانڈر کراچی لیفٹیننٹ جنرل اویس دستگیری نے مزار قائد پر حاضری دی پھول رکھے اور فاتحہ خوانی کی۔

اسی طرح لاہور میں مزار اقبال پر گارڈز کی تبدیلی کی پروقار تقریب کا انعقاد کیا گیا جس میں گورنر پنجاب سلیم حیدر خان نے مزار پر حاضری دی، پھول رکھے اور فاتحہ خوانی کی۔

یوم تشکر کی خصوصی تقریب آج رات پاکستان مونیومنٹ اسلام آباد میں ہوگی۔

وزیراعظم شہبازشریف تقریب کے مہمان خصوصی ہوں گے، اس کے علاوہ چیئرمین جوائنٹ چیفس آف اسٹاف کمیٹی اور سروسزچیفس تقریب  میں شریک ہونگے۔

صدر مملکت آصف علی زرداری کا یوم تشکر پر پیغام

صدر مملکت نے یوم تشکر پر اپنے پیغام میں کہا کہ آج بلا اشتعال بھارتی جارحیت کے جواب میں آپریشن بنیان مرصوص کی کامیابی اور یوم تشکر منا رہے ہیں، میں ربِ ذوالجلال کا شکر گزار ہوں کہ اُس نے ہمیں اس نازک گھڑی میں فتح سے نوازا۔

صدر مملکت نے یہ بھی کہا کہ کامیابی پر پاکستان کی مسلح افواج کے دلیر سپاہیوں اور مسلح افواج کے سربراہان کو خراجِ تحسین پیش کرتا ہوں، یہ کامیابی صرف پاکستان کی افواج کی نہیں بلکہ پوری قوم کی کامیابی ہے۔

وزیراعظم محمد شہباز شریف کا یوم تشکر پر خصوصی  پیغام

آج ، بھارت کی کھلی جارحیت اور اشتعال انگیزی کے خلاف پاکستان کی شاندار کامیابی اور فتح پر اللہ تعالیٰ کا شکر بجا لانے کے لئے ملک بھر میں یوم تشکر منایا جا رہا ہے۔

میں پاک افواج کے ان تمام شہداء کو خراج عقیدت پیش کرتا ہوں جنہوں نے معرکہء حق کی تکمیل میں اپنی جانوں کا نذرانہ پیش کیا، میں اس موقع پر اپنی اور قوم کی طرف سے جنرل سید عاصم منیر کا دل کی اتھاہ گہرائیوں سے شکریہ ادا کرتا ہوں کہ جن کی دانشمندانہ اور دلیرانہ قیادت میں یہ عظیم معرکہ سر ہوا۔