پاک فوج کی حالیہ کامیابی پر ملک بھر میں عوام کی جانب سے بھرپور جوش و جذبے سے یکجہتی کا اظہا کیا جارہا ہے، مختلف شہروں میں نکالے جانے والی ریلیوں میں پاکستانی عوام، مذہبی رہنما اور سیاسی جماعتوں کے نمائندگان پاک فوج کی حمایت میں بھرپور آواز بلند کر رہے ہیں۔

لاہور میں بین المذاہب تشکر ریلی نولکھا چرچ سے نکالی گئی جس کی قیادت ڈاکٹر مجید ایبل نے کی۔ ریلی میں چیئرمین کل مسالک علماء بورڈ مولانا محمد عاصم مخدوم، سکھ رہنما سردار کلیان سنگھ کلیان اور ہندو رہنما پنڈت بھگت لال کھوکھر نے بھی شرکت کی۔

مقررین نے کہا کہ پاک فوج دنیا کی سب سے بہترین فوج ہے اور اس نے اپنی طاقت کو ثابت کر دیا ہے۔

ریلی کا مقصد یہ تھا کہ ہم سب اپنے فوج کے ساتھ کھڑے ہیں اور دشمن کے تمام ناپاک عزائم کو ناکام بنائیں گے۔

جیکب آباد میں ایم کیو ایم پاکستان نے پاک فوج کی کامیابی پر یوم تشکر منایا اور بھارتی جارحیت کے خلاف ریلی نکالی، جس میں ایم کیو ایم کارکنان اور شہریوں کی بڑی تعداد نے شرکت کی۔

شرکاء نے بینرز اور پلے کارڈز کے ساتھ بھارتی جارحیت کے خلاف نعرے بازی کی اور پاک فوج کی حمایت میں فلگ شگاف نعرے لگائے۔

مقررین نے کہا کہ پاک فوج کی حکمت عملی اور بہادری نے قوم کا سر فخر سے بلند کر دیا ہے۔

تھرپارکر کے سیاحتی مقام ماروی کے کنویں پر بھی ایک منفرد اظہار یکجہتی کے طور پر اونٹوں پر سوار ہو کر ریلی نکالی گئی۔ شرکاء نے قومی پرچم تھامے اور بھارت کے ناپاک عزائم کے خلاف بھرپور نعرے بازی کی۔

ریلی کے شرکاء نے کہا کہ ہم پاک افواج کے ساتھ ہیں اور دشمن کے ناپاک ارادوں کو کبھی کامیاب نہیں ہونے دیں گے۔

سکھر میں بھی غلام محمد مہر میڈیکل کالج اور ٹیچنگ اسپتال کی جانب سے پاک فوج سے اظہار یکجہتی کے لیے ریلی نکالی گئی، جس میں کالج کے ڈاکٹرز اور اسپتال کے اسٹاف نے شرکت کی۔

شرکاء نے پاکستانی پرچم تھامے اور پاک افواج کے حق میں نعرے لگائے۔

ملک بھر میں نکالی گئی ان ریلیوں نے ایک بار پھر ثابت کر دیا کہ پاکستانی قوم پاک افواج کی پشت پر کھڑی ہے اور ہر مشکل گھڑی میں اپنے محافظوں کے ساتھ ہے۔