راولپنڈی: پاک فوج کے شعبہ تعلقات عامہ (آئی ایس پی آر) کے ڈائریکٹر جنرل (ڈی جی) لیفٹیننٹ جنرل احمد شریف نے کہا ہے کہ بھارت خطے میں دہشت گردی کی سرپرستی کر رہا ہے۔

ڈی جی آئی ایس پی آر لیفٹیننٹ جنرل احمد شریف نے ایک انٹرویو میں روسی نشریاتی ادارے “آر ٹی عربیہ” سے خصوصی گفتگو کرتے ہوئے پاک بھارت تعلقات، علاقائی سلامتی اور دہشت گردی سے متعلق پاکستان کے مؤقف پر تفصیل سے روشنی ڈالی۔

لیفٹیننٹ جنرل احمد شریف نے کہا کہ پاک بھارت تناؤ کو سمجھنے کے لیے اس کے تاریخی اور سیکیورٹی تناظر کو مدنظر رکھنا ضروری ہے۔

ترجمان پاک فوج نے بھارت پر خطے میں، خصوصاً پاکستان کے خلاف دہشت گردی کی سرپرستی کرنے کا الزام عائد کیا اور کہا کہ بھارت پاکستان میں جاری دہشت گردی کا اصل سرپرست ہے۔

پہلگام واقعہ اور بھارتی ردِعمل

ڈی جی آئی ایس پی آر نے کہا کہ پہلگام واقعے کے فوری بعد بھارتی میڈیا اور سوشل میڈیا پر پاکستان کے خلاف بلا ثبوت الزامات لگائے گئے جبکہ بھارتی وزارتِ خارجہ نے دو روز بعد تسلیم کیا کہ تفتیش ابھی جاری ہے، بغیر تحقیقات کے الزامات لگانا غیر ذمہ دارانہ طرزِ عمل ہے۔

انہوں نے کہا کہ پاکستان نے واضح موقف اختیار کیا کہ اگر بھارت کے پاس کوئی ثبوت موجود ہے تو اسے کسی غیر جانبدار بین الاقوامی ادارے کو پیش کیا جائے، پاکستان مکمل تعاون کو تیار ہے، تاہم بھارت نے اس پیشکش کو رد کر کے یکطرفہ عسکری کارروائی کا راستہ اپنایا۔

بھارتی جارحیت اور پاکستان کا جواب

لیفٹیننٹ جنرل احمد شریف نے انکشاف کیا کہ 6 اور 7 مئی کی رات بھارت نے پاکستان پر میزائل حملے کیے، جس کے نتیجے میں پاکستان نے نہایت ذمہ داری اور موثر انداز میں جواب دیا، پاکستان کی فضائیہ نے بھارتی حملے کے جواب میں پانچ طیارے مار گرائے۔

انہوں نے کہا کہ 9 اور 10 مئی کی شب بھارت کی جانب سے مزید میزائل حملے کیے گئے لیکن پاکستان نے 10 مئی کی صبح انتہائی احتیاط اور پیشہ ورانہ مہارت سے صرف بھارتی فوجی تنصیبات کو نشانہ بنایا جبکہ کسی شہری ہدف کو نقصان نہیں پہنچایا گیا۔

ترجمان پاک فوج نے کہا کہ یہ ایک مناسب، منصفانہ اور متوازن جواب تھا جس سے دشمن کو واضح پیغام دیا گیا۔

سفارت کاری اور امن کی کوششیں

ڈی جی آئی ایس پی آر کے مطابق پاکستان کی سفارتی کوششیں انتہائی مؤثر ثابت ہوئیں، ہماری سفارتی کور نے عالمی برادری کو زبردست فہم و فراست کے ساتھ انگیج کیا اور پاکستان کے امن پسند رویے کو اجاگر کیا۔

لیفٹیننٹ جنرل احمد شریف نے کہا کہ ہم جنگجو قوم نہیں بلکہ سنجیدہ، امن پسند قوم ہیں، اور ہماری پہلی ترجیح ہمیشہ امن ہی رہی ہے۔

ترجمان پاک فوج کا کہنا تھا کہ امریکہ سمیت بڑی طاقتیں بخوبی جانتی ہیں کہ پاکستان کے عوام کا جذبہ اور عزم کیا ہے۔

قوم اور افواج ایک ساتھ

لیفٹیننٹ جنرل احمد شریف نے مزید کہا کہ پاکستان کی مسلح افواج نے اپنی آئینی و قومی ذمہ داری پوری کی ہے اور آئندہ بھی ملک کی خودمختاری اور سرحدوں کے تحفظ کے لیے ہر قیمت پر کردار ادا کریں گی۔

ڈی جی آئی ایس پی آر نے زور دیتے ہوئے کہا کہ قوم اور افواجِ پاکستان سیسہ پلائی ہوئی دیوار کی مانند متحد ہیں۔