وزارت خزانہ نے توانائی کے شعبے کا گردشی قرضہ کم کرنے کے لیے 1250 ارب روپے جاری کرنے کا فیصلہ کیا ہے۔
ذرائع وزارت خزانہ کے مطابق عالمی مالیاتی فنڈز (آئی ایم ایف) کی شرائط پر توانائی شعبے کا 1250 ارب روپے گردشی قرضہ سیٹل کرنے پلان آئی ایم ایف سے شیئر کردیا گیا ہے جب کہ پٹرولیم سیکٹر کے لیے 1000 ارب اور پاور سیکٹر کیلئے 250 ارب کیش جاری کی جائے گی۔
ذرائع وزارت خزانہ نے اس حوالے سے نگران وزیراعظم انوارالحق کاکڑ کو بریفنگ دی اور نگران وزیراعظم نے آئی ایم ایف سے منظوری کے لیے ہدایات جاری کر دیں۔
ذرائع وزارت خزانہ کا کہنا ہے کہ آئی ایم ایف شرائط پر عملدرآمد کرتے ہوئے گردشی قرضہ کیلئے کیش سیٹلمنٹ کی جائے گی، او جی ڈی سی ایل کو 600 ارب، پی پی ایل کو 150 ارب اور جی ایچ پی ایل کو 170 ارب جاری ہوں گے جب کہ نیشنل پاور پارکس مینجمنٹ کمپنی لمیٹڈ کو بھی 100 ارب روپے جاری کیے جائیں گے۔
ذرائع وزارت خزانہ نے بتایا کہ توانائی شعبے کا گردشی قرضہ کی سیٹلمنٹ کیلئے آئی ایم ایف سے منظوری لازمی ہے اور وزیراعظم آفس کی وزارت خزانہ کو گردشی قرضہ سیٹلمنٹ کی منظوری کیلئے آئی ایم ایف سے منظوری لینے کی ہدایات کردی۔
ذرائع وزارت خزانہ کا مزید کہنا تھا کہ آئی ایم ایف سے منظوری کے بعد وزارت خزانہ 900 ارب روپے جاری کرے گی، گردشی قرضہ کی سیٹلمنٹ سے ڈیویڈنڈ اور ٹیکس کی مد میں 800 ارب روپے موصول ہوں گے، گردشی قرضہ کی سیٹلمنٹ کیلئے کیش جاری کرنے سے مالیاتی خسارہ نہیں بڑھے گا۔