پنجاب میں اسکولوں کے اوقات کار میں تبدیلی، صبح 8:15 سے پہلے اسکول کھولنے پر پابندی عائد کر دی گئی ہے۔

ڈی جی ماحولیات عمران حامد شیخ نے اس حوالے سے نوٹیفیکشن جاری کردیا ہے، جبکہ اسکول اوقات میں تبدیلی فوری نافذ العمل ہے۔

ڈی جی ماحولیات کے مطابق تمام سرکاری و نجی اسکول 4 دسمبر 2024 سے صبح 8:15 کے بعد کھولنے کے پابند ہوں گے، جبکہ نوٹیفکیشن ماحولیاتی تحفظ ایکٹ 1997 کے تحت جاری کیا گیا۔

عمران حامد شیخ نے کہا کہ خلاف ورزی کرنے والے اسکولز کے خلاف قانونی کارروائی عمل میں لائی جائے گی، جبکہ نوٹیفکیشن کی خلاف ورزی پر جرمانے اور سزا کا اطلاق ہوگا۔

ڈی جی ماحولیات کا یہ بھی کہنا تھا کہ ماحولیاتی آلودگی کی روک تھام کے لیے یہ اقدامات کیے گئے ہیں، جبکہ اسکول ایجوکیشن اور اسپیشل ایجوکیشن ڈیپارٹمنٹس کو احکامات پر عمل درآمد کا پابند بنایا گیا۔

عمران حامد شیخ نے تمام کمشنرز اور ڈپٹی کمشنرز کو ہدایات جاری کرتے ہوئے کہا کہ فیصلے پر مکمل عمل درآمد کو یقینی بنائیں، جبکہ یہ فیصلہ طلبہ اور اساتذہ کی صحت کے تحفظ کے لیے کیا گیا۔