لاہور: فیلڈ مارشل سید عاصم منیر کی بطور چیف آف ڈیفنس فورسز تعیناتی پر قرارداد پنجاب اسمبلی میں جمع کروادی گئی ہے۔
قرارداد مسلم لیگ ن کی رکن پنجاب اسمبلی حنا پرویز بٹ کی جانب سے جمع کروائی گئی جس میں کہا گیا کہ یہ ایوان وزیراعظم کی جانب سے فیلڈ مارشل سید عاصم منیر کی تاریخی تعیناتی کے فیصلے کا خیرمقدم کرتا ہے۔
قرارداد کے متن کے مطابق ایوان قرار دیتا ہے کہ ملک کے پہلے چیف آف ڈیفنس فورسز کی حیثیت سے ان کا تقرر قومی سلامتی کے لیے سنگِ میل ہے، پانچ سالہ تعیناتی دفاعی قیادت میں تسلسل اور استحکام کو یقینی بناتی ہے۔
متن میں کہا گیا کہ ایوان تسلیم کرتا ہے کہ فیلڈ مارشل سید عاصم منیر کی قیادت ملکی دفاع کو جدید تقاضوں سے ہم آہنگ کرے گی۔ پاکستان کی سلامتی، خودمختاری اور علاقائی استحکام کے لیے یہ فیصلہ نہایت اہم ہے۔
حنا پرویز بٹ نے قرارداد میں کہا کہ ایوان چیف آف ایئر اسٹاف ائیر چیف مارشل ظہیر احمد بابر سدھو کی مدتِ ملازمت میں توسیع کے فیصلے کو بھی سراہتا ہے، فضائی دفاع کو مضبوط بنانے کے لیے یہ توسیع وقت کی اہم ضرورت تھی۔
قرارداد کے مطابق ایوان مسلح افواج کی پیشہ ورانہ خدمات اور قربانیوں کو خراجِ تحسین پیش کرتا ہے، پاکستان کی فوج، فضائیہ اور دفاعی ادارے ریاست کے مضبوط ترین ستون ہیں۔
مزید پڑھیں: فیلڈ مارشل عاصم منیر کی بطور چیف آف ڈیفنس فورسز تعیناتی کا نوٹیفکیشن جاری
متن میں کہا گیا کہ قومی سلامتی کے فیصلوں میں تسلسل اور ہم آہنگی ناگزیر ہے، ایوان مطالبہ کرتا ہے کہ دفاعی اداروں کی مضبوطی کے لیے تمام قومی فورمز مشترکہ کردار ادا کریں۔
حنا پرویز بٹ کا کہنا تھا کہ مستحکم عسکری قیادت ہی معاشی، سیاسی اور سلامتی کے اہداف کے حصول میں معاون ہوتی ہے، ایوان سمجھتا ہے کہ پاکستان کے دفاع، امن اور اتحاد کے لیے ایک مضبوط کمانڈ ساخت بنیادی حیثیت رکھتی ہے۔
قرارداد کے متن میں مزید کہا گیا کہ یہ ایوان اعلان کرتا ہے کہ قومی سلامتی کے تقاضوں کے مطابق کیے گئے فیصلوں کی مکمل حمایت جاری رہے گی، پاکستان کی یکجہتی اور دفاع کے لیے تمام ادارے ایک سمت میں کام کرتے رہیں گے۔
