اسلام آباد: وفاقی حکومت نے سیاسی افراتفری پھیلانے والےعناصر کے گرد گھیرا تنگ کرتے ہوئے تحریک انصاف کے اہم رہنماؤں کے بیرون ممالک جانے پر پابندی عائد کردی۔
ذرائع کے مطابق سیاسی افراتفری پھیلانے والےعناصر کے گرد گھیرا تنگ ہوگیا ہے جب کہ وفاقی حکومت نے سیاسی رہنماؤں کے نام ایگزٹ کنٹرول لسٹ میں ڈالنے کی باضابطہ منظوری دے دی گئی ہے۔
ذرائع نے بتایا کہ بانی پی ٹی آئی، شاہ محمود قریشی، عمرایوب، فوادچوہدری اور شبلی فراز کے نام شامل ہیں جب کہ علی امین گنڈہ پور، شہریارآفریدی اور عثمان ڈار کے نام بھی ای سی ایل میں شامل کیے گئے ہیں۔
علاوہ ازیں شیری مزاری، زرتاج گل، مسرت چیمہ اور کنول شوزب کا نام بھی شامل کیا گیا ہے، شیخ رشید، شیخ راشد اور میجر ریٹائرڈ طاہر صادق کے نام شامل ہیں جب کہ راجہ بشارت اور واثق قیوم عباسی سمیت دیگر شخصیات پر بھی پابندی عائد کی گئی ہے۔
ذرائع نے مزید بتایا کہ محکمہ داخلہ پنجاب نے ان افراد کے نام ای سی ایل میں ڈالنے کے لیے وفاقی حکومت کو باضابطہ سفارش ارسال کی تھی۔ یہ سفارشات 9 مئی کے واقعات اور سیاسی افراتفری سے متعلق کیسز کے تناظر میں بھجوائی گئیں۔
ای سی ایل کمیٹی نے تمام سفارشات کا جائزہ لینے کے بعد انہیں وفاقی حکومت کو منظوری کے لیے پیش کیا تھا جس کے بعد کابینہ نے سرکولیشن کے ذریعے ان پر حتمی منظوری دے دی۔
