سیکیورٹی فورسز نے بلوچستان کے ضلع قلات میں انٹیلیجنس بیسڈ آپریشن کے دوران 12 بھارتی اسپانسرڈ دہشت گردوں کا جہنم واصل کردیا۔
پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے بلوچستان کے ضلع قلات میں بھارتی اسپانسرڈ فتنہ الہندوستان کے دہشت گردوں کی موجودگی کی اطلاع پر کارروائی کی۔
آئی ایس پی آر نے بتایا کہ آپریشن کے دوران سیکیورٹی فورسز نے دہشت گردوں کے ٹھکانے کو موثر انداز میں نشانہ بنایا۔
یہ بھی پڑھیں؛ غزہ کیلیے فوج بھیجنے کا فیصلہ حکومت اور پارلیمنٹ کرے گی، ڈی جی آئی ایس پی آر
ترجمان پاک فوج کا کہنا ہے کہ قلات میں انٹیلیجنس بیسڈ آپریشن کے دوران سیکیورٹی فورسز اور دہشت گردوں میں شدید فائرنگ کا تبادلہ ہوا جس کے دوران 12 بھارتی اسپانسرڈ دہشت گردوں کو ہلاک کردیا۔
آئی ایس پی آر کے مطابق مارے جانے والے دہشت گردوں سے ہتھیار، ایمونیشن اور بارودی مواد برآمد ہوا، ہلاک ہونے والے بھارتی اسپانسرڈ دہشت گرد علاقے میں دہشت گردی کی کئی کارروائیوں میں ملوث تھے۔
پاک فوج کے شعبہ تعلقات عامہ نے کہاکہ علاقے کو فتنہ الہندوستان کے دہشت گردوں سے پاک کرنے کے لیے سینیٹائزیشن آپریشن جاری ہے۔
ترجمان پاک فوج نے کہا کہ سیکیورٹی فورسز اور قانون نافذ کرنے والے ادارے عزم استحکام وژن کے تحت دہشت گردی کے خاتمے کی کارروائیاں پوری قوت سے جاری رکھیں گے۔
