صدرِ مملکت آصف علی زرداری نے پاک بحریہ کی انسدادِ منشیات کی حالیہ کامیاب کارروائی پر خراجِ تحسین پیش کیا ہے، جس میں بحیرہ عرب میں 1500 کلوگرام حشیش ضبط کی گئی۔
صدرِ مملکت نے کہا کہ یہ کامیابی پاک بحریہ کی اعلیٰ پیشہ ورانہ صلاحیت اور مؤثر نگرانی کا ثبوت ہے اور اس سے قومی مفادات کے تحفظ اور غیرقانونی سرگرمیوں کے سدباب کے لیے ریاستی عزم مضبوط ہوتا ہے۔
صدرِ مملکت نے مزید کہا کہ علاقائی و بین الاقوامی شراکت داروں کے ساتھ پاک بحریہ کا تعاون پاکستان کے سنجیدہ کردار اور محفوظ سمندری ماحول کے لیے عزم کی عکاسی کرتا ہے۔
انہوں نے زور دیا کہ سمندری حدود میں ہر قسم کی غیرقانونی سرگرمیوں کے خاتمے کے لیے ریاست اور ادارے پُرعزم ہیں۔
اسی موقع پر وزیراعظم نے بھی اس کامیاب کارروائی کی تعریف کی اور کہا کہ 1500 کلوگرام حشیش ضبط کر کے پاکستان بحریہ نے سمگلنگ کی کوشش کو ناکام بنایا، جس کی مالیت تقریباً 3 ملین ڈالر بنتی ہے۔
وزیراعظم نے کہا کہ پاک بحریہ کی کڑی نگرانی اور پیشہ ورانہ مہارت کے باعث سمندروں میں سمگلنگ کا مکمل خاتمہ ممکن ہے۔
انہوں نے مزید کہا کہ پاک بحریہ علاقائی اور بین الاقوامی شراکت داروں کے ساتھ مشترکہ اور مربوط بحری سلامتی کی کوششوں میں ایک فعال کردار ادا کر رہی ہے، جو قابل تحسین ہے۔