اسلام آباد: سارک چارٹر ڈے کی 40ویں سالگرہ کے موقع پر صدر مملکت آصف علی زرداری اور وزیر اعظم شہباز شریف نے تمام رکن ممالک کو مبارکباد دی ہے۔

صدرِ پاکستان نے جنوبی ایشیائی خطے کے عوام و حکومتوں کو مبارکباد دیتے ہوئے کہا کہ اسلام آباد نے چوتھے اور بارہویں سارک سربراہ اجلاس کی میزبانی کی، انیسواں اجلاس 2016 میں بھارت کی عدم شرکت کے باعث ملتوی ہوا، گزشتہ 11 برس سے سارک کا عمل جمود کا شکار ہے۔

انہوں نے کہا کہ بھارت کا رویہ مؤثر علاقائی تعاون میں بڑی رکاوٹ ہے، خطے کی ترقی اور امن غیر ضروری طور پر تعطل کا شکار ہے، سارک کے متبادل نئے علاقائی فریم ورک پر غور بڑھ رہا ہے۔

آصف زرداری کا کہنا تھا کہ ایران اور چین کی شمولیت سے علاقائی رابطہ کاری میں اضافہ ہوگا، پاکستان جامع، تعاون پر مبنی علاقائی نظام کے لیے پُرعزم ہے، تجارت، ٹرانزٹ اور توانائی کے روابط کے فروغ کے لیے تیار ہیں۔

انہوں نے مزید کہا کہ خطے کے مسائل مشترکہ ہیں، حل بھی مشترکہ ہونے چاہئیں، باہمی احترام اور تعاون سے خطہ زیادہ پرامن اور خوشحال بن سکتا ہے۔

دوسری جانب وزیراعظم شہباز شریف نے بھی سارک چارٹرڈے کی 40ویں سالگرہ کے موقع پر اپنے جاری کردہ پیغام میں کہا کہ 40 برس قبل سارک کی بنیاد رکھی گئی، جس کا مقصد مکالمے کا فروغ تھا، بدقسمتی سے علاقائی اور سیاسی عوامل کے باعث یہ مقاصد حاصل نہیں ہوسکے۔

اپنے پیغام میں وزیراعظم نے پُرامن، مستحکم اور خوشحال جنوبی ایشیا کی تشکیل کیلئے تمام رکن ممالک کو مل کر کام کرنے کی ضرورت پر زور دیا۔