اسلام آباد: پاکستان الیکٹرانک میڈیا ریگولیٹری اتھارٹی (پیمرا) کے قائم مقام چیئرمین بیرسٹر سکندر رشید چوہدری نے الفلاح ایسٹ مینجمنٹ کے چیف ایگزیکٹو آفیسر خلدون بن لطیف سے اہم ملاقات کی جس میں پاکستانی میڈیا مواد کو عالمی سطح تک پہنچانے کے لیے خصوصی میڈیا فنڈ کے قیام پر تبادلہ خیال کیا گیا۔
اسلام آباد میں ہونے والی اس ملاقات میں دونوں فریقین نے پرائیویٹ فنڈز کی کیٹیگری کے تحت ایک ایسے خصوصی میڈیا فنڈ کے قیام کے امکانات کا جائزہ لیا جس کا مقصد پاکستانی مواد کو بین الاقوامی پلیٹ فارمز تک رسائی دلانا ہے۔
ملاقات میں میڈیا انڈسٹری کو درپیش موجودہ چیلنجز، مالی رکاوٹوں اور عالمی مارکیٹ میں مسابقت کے تقاضوں پر تفصیلی گفتگو کی گئی۔
اس موقع پر ایسی ممکنہ حکمتِ عملی اور تعاون کے نئے پہلوؤں پر بھی بات ہوئی جو میڈیا سیکٹر میں سرمایہ کاری اور ترقی کے لیے نئے راستے کھول سکیں۔
پیمرا اور الفلاح ایسٹ مینجمنٹ کے درمیان اس بات پر اتفاق کیا گیا کہ میڈیا فنڈ سے نہ صرف پاکستانی مواد کی معیار ی تخلیق کو تقویت مل سکتی ہے بلکہ اسے عالمی اسٹریمنگ اور ڈیجیٹل پلیٹ فارمز پر مؤثر طریقے سے پیش کرنے میں بھی مدد ملے گی۔