اشک آباد: وزیراعظم محمد شہباز شریف نے کہا ہے کہ دہشت گردی کا نیا خطرہ افغان سرزمین سے سر اٹھا رہا ہے۔
وزیراعظم نے ترکمانستان کی 30سالہ مستقل غیر جانبداری کی سالگرہ کے حوالے سے فورم سے خطاب کرتے ہوئے کہا کہ اشک آباد کے شاندار شہر میں ہونا میرے لیے باعثِ مسرت ہے، سفید سنگ مرمر کی خوبصورتی اور ترکمان عوام کی گرمجوشی قابل تعریف ہے۔
انہوں نے کہا کہ مہمان کو اہلِ خانہ سے بڑھ کر احترام دینا ترکمانستان کی روایت ہے، ترکمان قوم کے رہنما گربانگلی بردی محمدوف اور صدر سردار بردی محمدوف میرے لیے بھائیوں جیسے ہیں۔
شہباز شریف نے کہا کہ ترکمانستان کو اسکی مستقل غیرجانبداری کے 30 سال مکمل ہونے پر مبارکباد دیتا ہوں، 2025 کو بین الاقوامی سالِ امن و اعتماد قرار دینا خوش آئند ہے۔
انکا کہنا تھا کہ پاکستان نے رواں سال سلامتی کونسل میں ذمہ داریاں سنبھالیں، عالمی امن و سلامتی کے فروغ کے لیے پاکستان اپنا بھرپور کردار ادا کررہا ہے، دہشت گردی کا نیا خطرہ افغان سرزمین سے سر اٹھا رہا ہے،عالمی برادری افغان حکومت پر ذمہ داریوں کی ادائیگی کے لیے زور ڈالے۔
وزیراعظم نے کہا کہ قطر، ترکیہ، سعودی عرب، متحدہ عرب امارات اورایران کے جنگ بندی کیلئے تعاون پرمشکور ہیں، تنازعات کا پرامن حل پاکستان کی خارجہ پالیسی کا بنیادی ستون ہے۔
انہوں نے کہا کہ پاکستان کی حمایت سے غزہ امن منصوبہ منظور ہوا، سلامتی کونسل کی قرارداد 2788 پاکستان کے وژن کی تائید ہے، 8 عرب اسلامی ممالک کے گروپ کے رکن کی حیثیت سے پاکستان کا امن مشن میں اہم کردار ہے۔
شہباز شریف نے کہا کہ غزہ جنگ بندی کی مشترکہ کوششوں کے نتیجے میں آج لاکھوں فلسطینیوں نے سکھ کا سانس لیا، مشرقِ وسطیٰ میں دیرپا جنگ بندی اور انسانی امداد کی فراہمی ضروری ہے، پائیدار امن اور پائیدار ترقی لازم و ملزوم ہیں۔
انکا کہنا تھا کہ 2030 ایجنڈا عالمی ترقی کا جامع لائحہ عمل ہے، مالیاتی شمولیت اور خواتین کو معاشی دھارے میں لانا ہماری ترجیح ہے، پاکستان کا صاف اور سرسبز ترقیاتی ماڈل عالمی مثال ہے۔
انہوں نے کہا کہ موسمیاتی تبدیلی اور عدم مساوات ترقی پذیر ممالک کے بڑے چیلنجز ہیں، ترقی یافتہ ٹیکنالوجیز تک منصفانہ رسائی ناگزیر ہے، ترکمانستان کی قیادت کا عالمی امن میں کردار لائقِ تحسین ہے، فورم کو عملی اقدامات میں ڈھالنے کی ضرورت ہے۔
وزیراعظم نے کہا کہ دنیا کو صفر-جمع سوچ سے نکل کر مشترکہ تعاون اپنانا ہوگا، تجارت ہی نہیں، انسانوں اور خیالات کو جوڑنے والے پل تعمیر کرنا ضروری ہے، مکالمہ اور سفارت کاری ہی تنازعات کے حل کا واحد راستہ ہے۔
شہباز شریف نے متحدہ چارٹر کے اصولوں سے مضبوط وابستگی کا اعادہ کیا اور کہا کہ امن، باہمی اعتماد اور مشترکہ خوشحالی ہماری مشترکہ منزل ہے، نفرت اور تنازع نے دنیا کو تاریکی میں دھکیل رکھا ہے، آج امن کی فاختہ کو دوبارہ پرواز دینے کی ضرورت ہے۔
