لاہور: وزیراعلیٰ مریم نواز شریف کی ٹیم پنجاب نے ایک اور اعزاز حاصل کرلیا۔
پنجاب سہولت بازار اتھارٹی کو سوئٹزرلینڈ کے مستند عالمی ادارے کی طرف سے اعلیٰ معیار پر آئی ایس او 901 اور آئی ایس او 27001 انٹرنیشنل سرٹیفکیٹس مل گئے۔
سہولت بازار اتھارٹی آئی ایس او 901 اورآئی ایس او 27001 سرٹیفکیٹ حاصل کرنے والا اپنی نوعیت کا پہلا منفرد ادارہ بن گئی، پنجاب بھر میں سہولت بازار اتھارٹی کے مجموعی طورپر 17ہزار سے زائد اسٹال قائم کرنے کا منفرد ریکارڈ بھی قائم کیا۔
پنجاب کے 36 اضلاع میں 6ہزار اسٹال اور نئے بننے والے 10 سہولت بازاروں میں ایک ہزار اسٹال قائم کیا جبکہ پنجاب بھر میں ویک اینڈ پر لگنے والے 10ہزار سے زائد عارضی اسٹال عوام کی سہولت کیلئے موجود ہیں۔
وزیراعلیٰ مریم نواز شریف نے پنجاب سہولت بازار اتھارٹی کے عالمی سرٹیفکیشن پر اظہار مسرت اور مبارکباد پیش کی اور بتایا کہ مزید تین اضلاع میں سہولت بازار کا آغاز جنوری تک کرنے کا ہدف مقرر کیا گیا ہے۔
مزید پڑھیں: وزیراعلیٰ پنجاب مریم نواز کا ’’اپنی چھت، اپنا گھر‘‘ کا خواب حقیقت بن گیا
انکا کہنا تھا کہ عوام کو سستی اورمعیاری اشیاء صرف کی فراہمی کیلئے سہولت بازار اتھارٹی کا کردار ناقابل فراموش ہے، سہولت بازار اتھارٹی نے صوبہ بھر میں پھل، سبزیوں اوردیگر اشیاء صرف کی سستے داموں فراہمی یقینی بنا کر قابل قدر عوامی خدمت سرانجام دیں۔
مریم نواز نے کہا کہ سستی اورمعیاری اشیاء کا حصول پنجاب کے عوام کا حق ہے، پنجاب کے سرکاری ادارو ں کو صحیح معنوں میں خدمت مرکز بنا رہے ہیں۔
انہوں نے مزید کہا کہ پنجاب میں سستی روٹی اورسستا آٹا عوام کیلئے احساس کا ناقابل تردید ثبوت ہے، سہولت بازاروں کا دائرہ کارڈویژن، اضلاع، تحصیل سے لیکر بتدریج چھوٹے شہروں تک وسیع کرنے کا عزم رکھتے ہیں۔