چین کے شہر ووہان میں واقع شوانگ لیو بیس پر پاک بحریہ کی ہنگور کلاس کی چوتھی آبدوز ’’غازی‘‘ کو کامیابی کے ساتھ لانچ کر دیا گیا۔
پاک فوج کے شعبہ تعلقات عامہ (آئی ایس پی آر) کے مطابق آبدوز کی لانچنگ کے ساتھ ہی پاک بحریہ نے ایک اور اہم سنگِ میل عبور کر لیا ہے۔
آئی ایس پی آر کا کہنا ہے کہ چین میں زیرِ تعمیر ہنگور کلاس کی تمام چار آبدوزیں اب سخت سمندری آزمائشوں سے گزر رہی ہیں اور انہیں پاکستان کے حوالے کیے جانے کے آخری مراحل میں داخل کر دیا گیا ہے۔
بیان کے مطابق پاکستان اور چین کے درمیان ہونے والے معاہدے کے تحت آٹھ ہنگور کلاس آبدوزیں حاصل کی جا رہی ہیں، جن میں سے چار آبدوزیں چین میں جبکہ چار آبدوزیں پاکستان میں کراچی شپ یارڈ اینڈ انجینئرنگ ورکس لمیٹڈ میں ٹرانسفر آف ٹیکنالوجی کے تحت تیار کی جائیں گی۔
آئی ایس پی آر کے مطابق ہنگور کلاس آبدوزیں جدید ترین ہتھیاروں اور جدید سینسر سسٹمز سے لیس ہوں گی، جو دور فاصلے سے اہداف کو مؤثر انداز میں نشانہ بنانے کی بھرپور صلاحیت رکھتی ہیں۔
یہ آبدوزیں خطے میں امن و استحکام کے قیام میں کلیدی کردار ادا کریں گی۔
لانچنگ کی تقریب میں پاکستان اور چین کے اعلیٰ سول و عسکری حکام نے شرکت کی۔ تقریب کو دونوں ممالک کے درمیان مضبوط اور گہرے ہوتے ہوئے دفاعی و بحری تعاون کا عملی مظہر قرار دیا گیا۔
آئی ایس پی آر کے مطابق یہ منصوبہ پاک بحریہ کی جدید کاری، دفاعی صلاحیت میں اضافے اور پاکستان۔چین اسٹریٹجک شراکت داری کی واضح علامت ہے۔
