راولپنڈی: فیلڈ مارشل سید عاصم منیر کی زیر صدارت 273 ویں کور کمانڈرز کانفرنس میں فورم نے دہشت گردی، جرائم اور سیاسی مفادات کے درمیان گٹھ جوڑ کو یکسر مسترد کردیا۔
فیلڈ مارشل سید عاصم منیر، نشانِ امتیاز (ملٹری) اور ہلالِ جرأت، چیف آف آرمی اسٹاف و چیف آف ڈیفنس فورسز کی زیر صدارت جنرل ہیڈکوارٹرز راولپنڈی میں 273 ویں کور کمانڈرز کانفرنس منعقد ہوئی۔
کانفرنس کے آغاز میں فورم نے مسلح افواج، قانون نافذ کرنے والے اداروں اور دہشت گردی کے حالیہ واقعات میں شہید ہونے والے معصوم شہریوں کے ایصالِ ثواب کے لیے فاتحہ خوانی کی۔
فورم نے دہشت گردی کے واقعات میں جانوں کا نذرانہ پیش کرنے والوں اور غیر ملکی ایماء پر دہشت گردی کے فروغ کے خلاف مادرِ وطن کا دفاع کرنے والوں کو خراجِ عقیدت پیش کیا۔
آرمی چیف کا بیان
آرمی چیف و چیف آف ڈیفنس فورسز نے پاکستان کی مسلح افواج کی غیر متزلزل جرات، اعلیٰ پیشہ ورانہ مہارت اور بے مثال قربانیوں کو زبردست خراجِ تحسین پیش کیا۔
انہوں نے حالیہ مہینوں میں ملک بھر میں انٹیلی جنس پر مبنی انسدادِ دہشت گردی کارروائیوں میں افواجِ پاکستان کی پُرعزم اور مؤثر کاوشوں کو بھی سراہا۔
فیلڈ مارشل سید عاصم منیر نے کہا کہ حکومت اور پاک فوج کی مشترکہ کوششوں اور پاکستانی عوام کی ثابت قدم حمایت کے باعث پاکستان بتدریج مگر یقینی طور پر استحکام، وسیع تر مواقع اور عزت و وقار کی جانب بڑھ رہا ہے۔
اندرونی و بیرونی سلامتی کا جائزہ
کانفرنس کے دوران اندرونی و بیرونی سلامتی کی مجموعی صورتحال کا جامع جائزہ لیا گیا اور ملک کو درپیش خطرات کے تناظر میں آپریشنل تیاریوں پر زور دیا گیا۔
شرکاء نے اس عزم کا اعادہ کیا کہ بھارتی سرپرستی میں سرگرم تمام دہشت گردوں، ان کے سہولت کاروں اور معاونین کے ساتھ کسی رعایت کے بغیر فیصلہ کن انداز میں نمٹا جائے گا۔
فورم نے دہشت گردی، جرائم اور سیاسی مفادات کے درمیان کسی بھی گٹھ جوڑ کو یکسر مسترد کرتے ہوئے واضح کیا کہ قومی یکجہتی، سلامتی اور استحکام کو نقصان پہنچانے کی کسی کو اجازت نہیں دی جائے گی، چاہے ایسے عناصر کسی بھی سیاسی وابستگی سے تعلق رکھتے ہوں۔
فورم نے اس عزم کا بھی اعادہ کیا کہ مسلح افواج اور عوام کے درمیان تفرقہ پیدا کرنے کی ہر کوشش ناکام بنائی جائے گی۔
بلوچستان حکومت کے خصوصی ترقیاتی اقدامات کو سراہا گیا
کانفرنس میں بلوچستان حکومت کے خصوصی ترقیاتی اقدامات کو سراہا گیا جو مقامی سطح پر عوام کو بااختیار بنانے اور سماجی روابط کے ذریعے دہشت گردی کے اسباب کے خاتمے میں معاون ثابت ہو رہے ہیں۔
شرکاء نے قومی ایکشن پلان کے تحت دیگر علاقوں میں بھی اسی طرز کے عوامی اقدامات کی ضرورت پر زور دیا۔
فورم نے کشمیری عوام کے حقِ خودارادیت اور ان کی جائز جدوجہد کے لیے پاکستان کے غیر متزلزل مؤقف کا اعادہ کیا۔
اسی طرح مسئلہ فلسطین پر پاکستان کے اصولی موقف کی بھی توثیق کی گئی اور غزہ میں فوری اور مستقل جنگ بندی، بلا رکاوٹ انسانی امداد کی فراہمی اور فلسطینی ریاست کے قیام کے لیے ایک قابلِ اعتماد راستے کا مطالبہ کیا گیا۔
کانفرنس کے اختتام پر آرمی چیف و چیف آف ڈیفنس فورسز نے کمانڈرز کو آپریشنل تیاری، نظم و ضبط، تربیت، جسمانی فٹنس، جدید جدتوں اور میدانِ جنگ میں اعلیٰ ترین پیشہ ورانہ معیار برقرار رکھنے کی ہدایات جاری کیں۔
انہوں نے قومی خودمختاری اور علاقائی سالمیت کے تحفظ کے لیے کنونشنل، سب کنونشنل، ہائبرڈ اور غیر متناسب چیلنجز سے نمٹنے کی پاک فوج کی صلاحیت پر مکمل اعتماد کا اظہار کیا۔
