برصغیر پاک و ہند کے کروڑوں مسلمانوں کو ایک آزاد اور خودمختار اسلامی مملکت کا تحفہ دینے والے قائدِ اعظم محمد علی جناح کا یوم پیدائش آج ملک بھر میں قومی جوش و جذبے سے منایا جارہا ہے۔

بابائے قوم قائد اعظم محمدعلی جناح کے یوم پیدائش کی مناسبت سے سرکاری اور نجی سطح پر سیمینارز، کانفرنسز اور تقاریب منعقد کی گئی ہیں۔

ان تقریبات کا مقصد نوجوانوں کو قائد اعظم کے وژن اور پاکستان کے نظریہ سے آگاہ کرنے کے ساتھ پاکستان کوان کی گراں قدر خدمات اور برصغیر کے مسلمانوں کے لیے  ایک آزاد خود مختار پاکستان کے خواب کو شرمندۂ تعبیر کرنے کے لیے کی گئی جدوجہد پر شاندارانداز میں خراجِ عقیدت پیش کرنا ہے۔

آج دن کا آغاز مساجد میں فجر کی نماز کے بعد بابائے قوم کے ایصالِ ثواب اور ملک کی بقا و سلامتی کے لیے خصوصی دعاؤں کے ساتھ کیا جائے گا۔

علاوہ ازیں دیگر مذاہب کے ماننے والوں کی عبادت گاہوں میں بھی خصوصی تقاریب کا اہتمام کردیا گیا ہے، وفاقی اور صوبائی دارالحکومتوں میں توپوں کی سلامی دی جائے گئی۔

بابائے قوم کے یوم پیدائش کی مناسبت سے سب سے اہم تقریب مزار قائد پر منعقد ہوگی۔ جہاں گارڈز کی پروقار تقریب میں پاکستان ملٹری اکیڈمی کے کیڈٹس مزار قائد پر گارڈز کے فرائض سنبھالیں گے جس کے بعد زندگی کے ہرشعبے سے تعلق رکھنے والی اہم شخصیات اور عام شہری بابائے قوم کے مزار پر حاضری دیں گے۔

بانیِ پاکستان قائد ِاعظم محمد علی جناح ایک بہادر اور عظیم لیڈر تھے

 قائدِاعظم محمد علی جناح 25 دسمبر1876 میں آج ہی کے روز کراچی میں پیدا ہوئے جنہوں نے 1913ء میں مسلم رہنماؤں کے ہمراہ مسلم لیگ میں شمولیت اختیار کی اور مسلمانوں کی سیاسی بیداری اور تحریک آزادی کی داغ بیل ڈالی۔

محمد علی جناح نے اپنے تدبر، فہم وفراست، سیاسی دوراندیشی اور جہد مسلسل کے باعث مسلمانوں کو انگریزوں کی غلامی سے نجات دلائی اور مسلامنوں کو ایک آزاد مملکت پاکستان کا تحفہ دیا، بانیِ پاکستان قائد اعظم محمد علی جناح برصغیر کے مسلمانوں کے لیے ایک عظیم اور بہادر لیڈر بن کر اُبھرے۔