اسلام آباد: صدر مملکت آصف علی زرداری نے کہا ہے کہ پاکستان اور آسٹریلیا کے درمیان تجارت اور سرمایہ کاری کے شعبوں میں تعاون مزید فروغ پائے گا۔
صدر مملکت آصف زرداری نے آسٹریلیا کے قومی دن پر پیغام دیتے ہوئے گورنر جنرل اور آسٹریلوی عوام کو مبارکباد پیش کی۔
آصف زرداری نے اپنے جاری کردہ پیغام میں کہا کہ پاکستان آسٹریلیا کے ساتھ دوستانہ اور تعمیری تعلقات کو قدر کی نگاہ سے دیکھتا ہے، پاکستان، آسٹریلیا شراکت داری باہمی احترام اور مشترکہ جمہوری اقدار پر مبنی ہے۔
انہوں نے کہا کہ تجارت، سرمایہ کاری اور تعلیم کے شعبوں میں تعاون مزید فروغ پائے گا، پاکستان کا آسٹریلیا کے ساتھ امن اور مشترکہ خوشحالی کے لیے قریبی تعاون کے لیے پرعزم ہے۔
صدر آصف زرداری نے مزید کہا کہ موسمیاتی مزاحمت اور جدت میں پاکستان، آسٹریلیا تعاون کے نئے مواقع موجود ہیں، اعلیٰ سطحی روابط سے باہمی تفہیم مزید مضبوط ہوگی۔
آخر میں صدر مملکت نے علاقائی و عالمی امور میں پاکستان اور آسٹریلیا کا تعاون جاری رکھنے کا اعادہ بھی کیا۔
