اقوام متحدہ میں پاکستانی مستقل مندوب عاصم افتخار نے کہا کہ جب قانون طاقت یا مصلحت کے آگے جھکےگاتو دنیا میں عدم استحکام پیدا ہوگا۔
اقوام متحدہ میں پاکستانی مستقل مندوب عاصم افتخار نے سلامتی کونسل میں مباحثے سے خطاب کرتے ہوئے کہا کہ قانون کی حکمرانی امن وانصاف اوراجتماعی سلامتی کے لیے ناگزیرہے، آج بین الاقوامی قانون کے احترام کوکڑی آزمائش کاسامناہے۔
انہوں نے کہا کہ یکطرفہ اقدامات نے ریاستوں کے عالمی قوانین پراعتمادکومجروح کیا، جب قانون طاقت یا مصلحت کے آگے جھکےگا توعدم استحکام گہراہوگا، تنازعات مزید شدت اختیار کریں گے اور پُرامن بقائے باہمی خطرے میں پڑ جائے گی۔
یہ بھی پڑھیں: پاکستان میں سیلاب سے نقصانات کا ذمے دار بھارت ہے ، عاصم افتخار
عاصم افتخار نے خبردار کیا کہ یکطرفہ اقدامات کو معمول بنانے کی کوششیں اجتماعی سلامتی کو کمزور کر رہی ہیں اور پاکستان خود بھی ایسی خلاف ورزیوں کا سامنا کر چکا ہے۔
انہوں نے کہا کہ بھارت نے گزشتہ سال پاکستانی خودمختاری کی خلاف ورزی کرتے ہوئے جارحیت کا ارتکاب کیا۔
پاکستانی مستقل مندوب کے مطابق پاکستان نے اس صورتحال میں حقِ دفاع کو ذمہ دارانہ، محتاط اور متناسب انداز میں استعمال کیا، اور پاکستانی ردعمل نے واضح پیغام دیا کہ جبر کسی صورت قابلِ قبول نہیں۔
انہوں نے زور دیا کہ ریاستوں کے مابین تعلقات کا واحد معیار بین الاقوامی قانون کا احترام ہونا چاہیے، کیونکہ اسی میں عالمی امن اور استحکام کی ضمانت پوشیدہ ہے۔
