کراچی میں گل پلازہ میں لگنے والی ہولناک آگ سے متعلق کمشنر کراچی نے حتمی تحقیقاتی رپورٹ مکمل کر لی ہے، جو وزیراعلیٰ سندھ مراد علی شاہ کو پیش کی جائے گی۔

حتمی تحقیقاتی رپورٹ کمشنر کراچی اور ایڈیشنل آئی جی پر مشتمل تحقیقاتی کمیٹی نے تیار کی ہے۔

ذرائع کے مطابق رپورٹ میں آگ لگنے کی وجوہات، فائر بریگیڈ اور ریسکیو اداروں کے ردِعمل اور امدادی کارروائیوں کی تفصیلات شامل کی گئی ہیں۔

اس کے علاوہ متاثرین، عینی شاہدین اور ریسکیو حکام سے حاصل کردہ معلومات کو بھی رپورٹ کا حصہ بنایا گیا ہے۔

تحقیقاتی رپورٹ کے مطابق گل پلازہ میں آگ رات 10 بج کر 15 منٹ پر لگی جبکہ 10 بج کر 26 منٹ پر فائر بریگیڈ کو اطلاع دی گئی، پہلا فائر ٹینڈر 11 منٹ کے اندر روانہ ہو کر 10 بج کر 37 منٹ پر جائے وقوعہ پہنچا، ڈپٹی کمشنر ضلع جنوبی 10 بج کر 30 منٹ پر موقع پر پہنچے جبکہ ریسکیو 1122 کا عملہ 10 بج کر 53 منٹ پر گل پلازہ پہنچا۔

رپورٹ میں بتایا گیا ہے کہ آگ کا آغاز گراؤنڈ فلور پر واقع ایک فلاور شاپ میں موجود بچے کے ہاتھوں ہوا، جس کے بعد آگ تیزی سے پھیلی اور ایئرکنڈیشننگ کے ڈکٹس کے ذریعے عمارت کے دیگر حصوں میں پھیل گئی۔

تحقیقاتی رپورٹ کے مطابق اس افسوسناک واقعے میں 79 افراد جاں بحق ہوئے، جن میں سے زیادہ تر اموات گل پلازہ کے میزنائن فلور پر ہوئیں۔