صدرِ مملکت آصف علی زرداری اور وزیرِاعظم شہباز شریف نے عیدالفطر کے موقع پر اپنے خصوصی پیغامات میں پوری پاکستانی قوم اور عالمِ اسلام کو دلی مبارکباد پیش کرتے ہوئے اتحاد، بھائی چارے اور قومی یکجہتی پر زور دیا ہے۔
صدر آصف علی زرداری نے اپنے پیغام میں کہا کہ عیدالفطر ماہِ رمضان کی عبادات، صبر، تقویٰ اور ایثار کا انعام ہے، جو انسان کو روحانی طور پر نئی زندگی کی طرف لے جاتا ہے۔
انہوں نے کہا کہ یہ دن ہمیں یاد دلاتا ہے کہ رمضان کی تربیت کو اپنی عملی زندگی کا حصہ بنایا جائے اور صبر، برداشت، ہمدردی اور عدل جیسے اصولوں کو فروغ دیا جائے۔
صدر مملکت نے اس بات پر بھی زور دیا کہ عید کی خوشیوں میں ضرورت مندوں، یتیموں اور محروم طبقات کو شامل کرنا ہماری سماجی ذمہ داری ہے، جبکہ قومی یکجہتی، آئینی بالادستی اور قانون کی پاسداری کے عزم کو بھی دہرانا چاہیے۔
انہوں نے دعا کی کہ اللہ تعالیٰ پاکستان کو امن، استحکام اور خوشحالی عطا فرمائے۔
دوسری جانب وزیرِاعظم شہباز شریف نے اپنے پیغام میں کہا کہ عیدالفطر اللہ تعالیٰ کی خاص رحمت اور فضل کا مظہر ہے، جو رمضان المبارک کی عبادات کے بعد مسلمانوں کو عطا ہوتی ہے۔
انہوں نے کہا کہ یہ دن ایثار، اتحاد، خدمتِ خلق اور اجتماعی ذمہ داری کے احساس کو تازہ کرتا ہے۔
وزیرِاعظم نے معاشرے کے کمزور طبقات کی مدد پر زور دیتے ہوئے کہا کہ حکومت نے رمضان المبارک میں ڈیجیٹل نظام کے ذریعے مالی معاونت کی فراہمی کو یقینی بنایا۔ انہوں نے کہا کہ اجتماعی تعاون ہی ملکی ترقی اور خوشحالی کی بنیاد ہے۔
اپنے پیغام میں وزیرِاعظم نے غزہ اور مشرقِ وسطیٰ میں جاری تنازعات پر تشویش کا اظہار کرتے ہوئے کہا کہ ان حالات میں امتِ مسلمہ کے اتحاد کی اشد ضرورت ہے تاکہ انصاف، وقار اور پائیدار امن کو فروغ دیا جا سکے۔
دونوں رہنماؤں نے اس عزم کا اعادہ کیا کہ پاکستان عالمی امن، رواداری اور بھائی چارے کے فروغ کے لیے اپنا کردار ادا کرتا رہے گا، اور دعا کی کہ عید کی یہ خوشیاں پوری دنیا میں امن و سلامتی کا باعث بنیں۔
