اسلام آباد: وزیراعظم شہباز شریف نے کہا ہے کہ امریکا اور ایران کی آمادگی پر پاکستان بامعنی اور نتیجہ خیز مذاکرات کی میزبانی کے لیے تیار ہے۔
وزیر اعظم شہباز شریف نے سماجی رابطے کی سائٹ ایکس پر جاری بیان میں کہا کہ پاکستان مشرق وسطیٰ میں جنگ کے خاتمے کے لیے ہونے والے مذاکرات کی مکمل حمایت کرتا ہے اور امریکا و ایران کی رضامندی سے ان مذاکرات کی میزبانی کے لیے تیار ہے۔
Pakistan welcomes and fully supports ongoing efforts to pursue dialogue to end the WAR in Middle East, in the interest of peace and stability in region and beyond. Subject to concurrence by the US and Iran, Pakistan stands ready and honoured to be the host to facilitate…
— Shehbaz Sharif (@CMShehbaz) March 24, 2026
وزیراعظم کا کہنا تھا کہ پاکستان خطے کے امن و استحکام کے مفاد میں جنگ کے خاتمے کے لیے جاری کوششوں کا خیرمقدم کرتا ہے۔
انہوں نے واضح کیا کہ دونوں فریقین کی آمادگی کے بعد پاکستان جاری تنازع کے جامع تصفیے کے لیے بامعنی مذاکرات کی سہولت فراہم کرنے کے لیے تیار ہے۔ وزیراعظم نے اس کردار کو پاکستان کے لیے اعزاز قرار دیا۔
دوسری جانب امریکا و ایران مذاکرات میں پاکستان کے مجوزہ کردار پر وزیر اعظم شہباز شریف کی زیر صدارت اعلیٰ سطح اجلاس ہوا۔
ذرائع کے مطابق اجلاس میں ایران و امریکا مذاکرات کے حوالے سے پاکستان کی حکمت عملی پر غور کیا گیا جب کہ پاکستان اور خطے کی سلامتی کو ترجیح دینے پر زور دیا گیا۔
ذرائع کا بتانا ہے کہ پاکستان اپنی حکمت عملی پر دوست ممالک مصر، ترکیہ سعودی عرب، یو اے ای و دیگر کو اعتماد میں لے گا۔
ذرائع نے مزید بتایا کہ وزیر خارجہ اسحاق ڈار کے مختلف ممالک کے وزراء خارجہ سے دوبارہ رابطوں کا آغاز ہوگیا ہے جب کہ اجلاس میں سفارتی و عسکری سفارت کاری کو جاری رکھنے کا فیصلہ کیا گیا ہے۔
