سری لنکن کرکٹ بورڈ اور کھلاڑیوں کا شکریہ، اظہر علی
قومی ٹیسٹ کرکٹ ٹیم کے کپتان اظہر علی نے کہا ہے کہ پاکستان میں ٹیسٹ کرکٹ کی واپسی کا پورا کریڈٹ سری لنکن کرکٹ بورڈ اور ٹیم کو جاتا ہے جو ٹیسٹ کھیلنے پاکستان آئی۔
راولپنڈی کرکٹ اسٹیڈیم میں پریس کانفرنس کرتے ہوئے اظہر علی نے کہا کہ ہم پاکستان آمد پر سری لنکن کرکٹ بورڈ اور کھلاڑیوں کا شکریہ ادا کرتے ہیں۔
قومی ٹیسٹ ٹیم کے کپتان نے کہا کہ پاکستان میں ٹیسٹ کرکٹ کی واپسی بہت بڑا ایونٹ ہے جس کے لیے سب بیتاب ہیں۔ دنیا کے دیگر ممالک کی ٹیمیں بھی پاکستان آنا چاہتی ہیں۔
اظہر علی کا کہنا تھا کہ پاکستان کا ہر شہری اس وقت خوش ہے۔ٹیم میں شامل نوجوان کھلاڑیوں کو اس ٹیسٹ میچ کا بہت بیتابی سے انتظار تھا۔
انہوں نے کہا کہ ہماری ٹیم میں اتحاد ہے اور ہم ایک خاندان ہیں،کسی کھلاڑی کا کسی سے بھی کوئی ذاتی اختلاف نہیں ہے۔
قومی ٹیسٹ کپتان نے مزید کہا کہ پریکٹس میں فیلڈنگ پر زیادہ زور دیا جا رہا ہے۔ہم پریشر میں نہیں ہیں بلکہ ایک خوشی ہے جسے محسوس کرنا ہوگا۔
اظہر علی کا کہنا تھا کہ یہاں کی پچ بہترین ہے ،کنڈیشن کو دیکھنا ہوگا جبکہ موسم کی صورتحال کو بھی مد نظر رکھنا ہوگا۔
انہوں نے کہا کہ ٹیسٹ میچ میں بہتری لانے کی کوشش کریں گے،کرکٹ ہمارا فخر ہے جتنا اچھا کھیلیں گے نتیجہ بھی اچھا ہوگا۔ہمیں جو چیلنج ملے گااس کو کاؤنٹر کریں گے۔
قومی ٹیسٹ کپتان کا کہناتھا کہ ایک سے دو سیریز ہارنے پر ٹیم بدلنا ٹھیک نہیں،سیکھنے کا موقع ملنا چاہے تاکہ پرفارمنس میں بہتری آ سکے۔کوچ کوئی بھی ہو اس سے پاکستان کو فائدہ بھی ہوا ہے۔
اظہر علی نے کہا کہ خواہش تھی ہمارے گراؤنڈز کی رونقیں بحال ہوں،دس سال کے بعد ٹیسٹ کرکٹ کی پاکستان میں واپسی پر بہت خوشی ہے ۔
انہوں نے کہا کہ تمام پلیئرز بہت خوش ہیں اور پوری کوشش کریں گے کہ ہماری فتح ہو۔آسٹریلیا میں ہم اچھی طرح سے پرفارم نہیں کر سکے،ہوم گراؤنڈ پر کھیل رہے ہیں پوری کوشش کریں گےجو کمی ہے اسے پور کریں۔
قومی ٹیسٹ ٹیم کے کپتان نے کہا کہ کپتان کا کھیل میں بھی اپنا رول ہوتا ہے،پورا احساس ہے اور کوشش کر رہا ہوں کہ اپنی فارم بحال کروں اور بڑا سکور کروں۔
اظہر علی کا کہنا تھا کہ اگر کپتان اچھا پرفارم کرے گا تو دیگر کھلاڑیوں کو بھی حوصلہ ہوتا ہے۔پریشر کو ہینڈل کرنے کی کوشش کرنی ہوگی۔
انہوں نے کہا کہ مجھے پاکستانی ٹیم میں دس سال ہو گئے ہیں،گزشتہ چار سےپانچ سال سے ٹیم کو جتوانے کی پوری کوشش کرتا ہوں ۔
قومی ٹیسٹ کپتان نے کہا کہ سلیکشن کمیٹی اور کپتان ساتھ ساتھ ہیں،جو پلیئر چاہیے ہوتا ہے میں سلیکشن کمیٹی کو بتاتا ہوں۔
اس موقع پر سری لنکن ٹیسٹ ٹیم کے کپتان دیموتھ کرونا رتنے کا کہنا تھا کہ میں پاکستان پہلی بارآیاہوں اورکافی خوش ہوں،ہم کوشش کریں گے کہ اچھی کرکٹ کھیلیں اورجیتیں۔
دیموتھ کرونا رتنے نے کہا کہ پاکستان کےپاس اچھابالنگ اٹیک ہے تاہم ہمیں مکی آرتھرکےآنےسےمددملی ہے،وہ پاکستان ٹیم کوجانتےہیں۔ ان کے ساتھ ٹریننگ کر کے پاکستان کی ٹیم کو جاننے کا موقع ملا ہے۔
انہوں نے کہا کہ ہم پاکستان کےخلاف کھیلےہیں اورجیتے بھی ہیں تاہم پاکستان کے ساتھ کھیلنا آسان نہیں ہے۔
واضح رہے کہ پاکستان میں دس سال بعد ٹیسٹ کرکٹ کی واپسی ہورہی ہے جبکہ پنڈی کرکٹ اسٹیڈیم میں 15 سال بعد کوئی ٹیسٹ کھیلا جائے گا۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News