پاکستان سپر لیگ (پی ایس ایل )2020 لائیو اسٹریمنگ رائٹس ہولڈر   نے  رائٹس کی خلاف ورزی پر پی سی بی سے اظہارِ افسوس اور معذرت کرلی۔

تفصیلات کے مطابق ٹیک فرنٹ انٹرنیشنل ایف زیڈ ای  کی جانب سے جاری پیغام میں پاکستان کرکٹ بورڈ سے اظہار افسوس کرتے ہوئے کہا گیا ہے کہ ٹیک فرنٹ انٹرنیشنل ایف زیڈ ای  فریقین کے مابین تنازعہ کا مناسب حل تلاش کرنے پر زور دیتا ہے۔

ٹیک فرنٹ انٹرنیشنل ایف زیڈ ای نے اپنے ایک بیان میں کہا  ’ٹیک فرنٹ انٹرنیشنل ایف زیڈ ای تسلیم کرتا ہے کہ وہ مخصوص سب لائسنسنگ کے سلسلے میں پی سی بی سے پیشگی اجازت طلب کرنے میں فعال نہیں رہا اور اس دوران یہ تمام عمل پی ایس ایل فائیو کے لائیو اسٹریمنگ رائٹس کے لیے پی سی بی کے ساتھ معاہدے کی روح اور شقوں کے مطابق نہیں رہا۔

’پیغام میں مزید کہا گیا کہ ہم نے پی سی بی سے اظہار افسوس کرنے کے ساتھ ساتھ معافی طلب کی ہے اور اس معاملے پر ہم ان کی ہمدردانہ نظر کے منتظر ہیں‘۔

دوسری جانب پی سی بی نے کہاکہ  ہم رائٹس ہولڈر کی معذرت اور ان کی پیش کردہ وضاحت کو سراہتے ہیں۔

بورڈ کی جانب سے مزید کہا گیا کہ اپنی طرف سے پی سی بی مزید چوکس رہنے کے لیے سخت اقدامات اٹھانے کا خواہاں ہے  جس میں  اندرونی چھان بین کے عمل اور طریقہ کار کو مزید مؤثر بنانااور کرنے اور نہ کرنے کے حوالے سے اپنے شراکت داروں کی بہتر رہنمائی کے سلسلے میں واضح گائیڈ لائنز کے مستقل اجراء کو یقینی بنانا شامل ہے۔