انٹرنیشنل کرکٹ کونسل ( آئی سی سی) کا کہنا ہے کہ   ورلڈ کپ 2011  کا فائنل فکس ہونے  کے کوئی ثبوت نہیں ہیں۔

تفصیلات کے مطابق ورلڈ کپ 2011  کا فائنل فکس ہونے  کے معاملے سے متعلق  آئی سی سی اینٹی کرپشن یونٹ نے بیان جاری کردیا۔

آئی سی سی اینٹی کرپشن یونٹ کے سربراہ الیکس مارشل کا کہنا ہے کہ آئی سی سی انٹیگریٹی یونٹ کے پاس کرکٹ ورلڈ کپ فائنل 2011 کے فکس ہونے کا کوئی ثبوت نہیں ہےنہ ہی   فکسنگ کی شکایت کا کوئی ریکارڈ ہے۔

الیکس مارشل کا کہنا تھا کہ  سری لنکن وزیر کھیل کی جانب سے آئی سی سی کو خط لکھے جانے کا کوئی ریکارڈ موجود نہیں ہے۔ ورلڈ کپ 2011 کے فائنل میں میچ فکسنگ کے ثبوت ہیں تو اینٹی کرپشن یونٹ سے رابطہ کیا جائے۔

انہوں نے کہا کہ  میچ فکسنگ اور ایسے نوعیت کے تمام الزامات کو انتہائی سنجیدگی سے لیتے ہیں لیکن ہمارے پاس آئی سی سی مینز کرکٹ ورلڈ کپ 2011  کے فائنل پر شک کرنے کی کوئی وجہ نہیں ہے۔

آئی سی سی اینٹی کرپشن یونٹ کے سربراہ نے کہا کہ  میچ فکسنگ کے دعووں کی تصدیق کے لیے کوئی ثبوت ملے تو تحقیقات کریں گے۔

واضح رہے کہ گذشتہ ماہ سابق سری لنکن وزیر کھیل کی جانب سے ورلڈکپ 2011 کا فائنل فکس ہونے کے الزامات کے بعد سری لنکن پولیس نے تحقیقات کا آغاز کیا تھا۔

تاہم کھلاڑیوں اور ایک چیف سلیکٹر کے بیانات کے بعد پولیس نے اس ورلڈکپ فائنل میچ کو کلین چٹ دیتے ہوئے تحقیقات بند کردی ہیں۔