چٹاگانگ: پہلے ٹیسٹ میچ کے دوسرے دن کے اختتام پر پاکستان نے بغیر کوئی وکٹ گوائے 145 رنز اسکور کرلیے ہیں۔

چٹاگانگ کے ظہور احمد چوہدری اسٹیڈیم میں پاکستان اور بنگلادیش کی ٹیموں کے درمیان پہلا ٹیسٹ میچ جاری ہے جس کے دوسرے دن کے کھیل کا آغاز اور اختتام پاکستان کے نام رہا جبکہ دن کے آغاز سے ہی پاکستان ٹیم کے بولرز نے اپنی دھاگ بٹھادی۔

دن کے آغاز میں پاکستان ٹیم کے بولر حسن علی نے بہترین گیند بازی کا مظاہرہ کرتے آئے 4 وکٹیں حاصل کیں اور جس کے بعد ان کی پہلی اننگ میں کل 5 وکٹیں ہوگئی ہیں جبکہ بنگلادیش کی جانب سے سنچری اسکور کرنے والے لیٹن داس بھی حسن علی کی گیند کا شکار ہوئے۔

بنگلادیش کی پوری ٹیم دوسرے روز صرف 77 رنز ہی اسکور کرسکی اور 330 رنز کے مجموعی اسکور پر آوٹ ہوگئی۔

بنگلادیش کی جانب سے سب سے زیادہ نز لیٹن داس نے اسکور کیے جنہوں نے 233 گیندوں پر 114 رنز بنائے جبکہ مشفیق الرحیم نے بھی ایک بڑی اننگ کھیلی اور 225 گیندوں پر 91 رنز اسکور کیے۔

علاوہ ازیں بنگلادیش کی جانب سے شادمان اسلام، سیف حسن اور نجم الحسین شنٹو نے 14،14 رنز اسکور کیے جبکہ مومن الحق صرف 6 رنز اور یاسر علی 5 رنز بناکر آوٹ ہوگئے۔

پاکستان کی جانب سے سب سے زیادہ 5 وکٹیں حسن علی نے حاصل کیں جبکہ اس کے علاوہ شاہین شاہ آفریدی اور فہیم اشرف نے 2،2 کھلاڑیوں کو آوٹ کیا اور ساجد خان نے 1 وکٹ حاصل کی۔

پاکستان نے اپنی پہلی اننگ میں بیٹنگ کا آغاز بھی شاندار انداز میں کیا اور دن کے اختتام تک پاکستان نے بغیر کوئی وکٹ گوائے 145 رنز اسکور کرلیے۔

پاکستان کی جانب سے عابد علی نے 180 گیندوں پر 93 رنز بنئے جبکہ ان کا ساتھ دینے والے بلے باز عبداللہ شفیق نے بھی اپنے ڈیبیو میچ میں ففٹی اسکور کرنے کے ساتھ 162 گیندوں پر 52 رنز  اسکور کرلیے ہیں۔

واضح رہے کہ پاکستان اور بنگلادیش کے درمیان 2 ٹیسٹ میچز پر مشتمل سیریز کھیلی جارہی ہے جس کا دوسرا اور آخری میچ 4 دسمبر سے ڈھاکہ میں کھیلا جائے گا۔