جنوبی افریقہ اور بھارت کے درمیان تین ون ڈے میچوں کی سیریز کا تیسرا اور آخری ون ڈے میچ آج کیپ ٹائون میں کھیلا جائے گا۔

یاد رہے کہ جنوبی افریقہ کی ٹیم نے سیریز کے پہلے دونوں ون ڈے میچ جیت کر سیریز میں دو صفر کی ناقابل شکست برتری حاصل کر رکھی ہے۔

پہلے ون ڈے میچ میں جنوبی افریقہ کی جانب سے تیمبا باووما اور ڈوسن نے اپنی ٹیم کی جیت میں اہم کردار ادا کیا تھا جبکہ دوسرے ون ڈے میچ میں جانیمن ملان اور کونٹن ڈی کوک نے نصف سنچریاں اسکور کرتے ہوئے ٹیم کو فتح دلائی تھی۔

جنوبی افریقہ بھارت کے خلاف تیسرے اور آخری ون ڈے میچ کیلئے ٹیم میں تبدیلی کرنے کا ارادہ بھی رکھتا ہے اور امکان ظاہر کیا جا رہا ہے کہ تیسرے اور آخری ون ڈے میچ کیلئے ٹیم کے اہم کھلاڑیوں کو آرام کا موقع دیا جائے گا۔

ادھر بھارتی ٹیم میں بھی تبدیلی کا امکان ظاہر کیا جا رہا ہے کہ سوریاکمار یادیو اور رتوراج گائیکواڈ کو آج تیسرے ون ڈے میچ کیلئے ٹیم میں شامل کیا جاسکتا ہے۔

واضح رہے کہ بھارت کی جانب سے پہلے ون ڈے میچ میں شیکھر دھاون اور ویرات کوہلی نے اپنی ٹیم کیلئے نصف سنچریاں اسکور کی تھیں تاہم دوسرے ون ڈے میچ میں دونوں بلے باز ناکام رہے تھے جبکہ ویرات کوہلی تو صفر پر ہی پویلین لوٹے تھے۔

دوسرے ون ڈے میچ میں بھارت کی جانب سے کے ایل راہول نے 55 جبکہ رشبھ پنت نے 85 رنز بنائے تھے۔

خیال رہے کہ جنوبی افریقہ کی ٹیم قبل ازیں ٹیسٹ سیریز میں بھی بھارت کو شکست دے چکی ہے۔