انگلش کپتان بین اسٹوکس سمیت 8 کھلاڑی بیماری میں مبتلا ہوگئے جس کے بعد انگلش کرکٹ بورڈ کا بیان بھی سامنے آگیا ہے۔

انگلش کرکٹ بورڈ کا کھلاڑیوں میں کورونا وائرس کے امکانات کو رد کرتے ہوئے کہنا ہے کہ کھلاڑی کل ہونے والا راولپنڈی ٹیسٹ کھیلنے کے لیے تیار ہیں۔

انہوں نے کہا کہ میڈیکل پینل کھلاڑیوں کا معائنہ کررہا ہے جب کہ کھلاڑیوں کی صحت معمول کے مطابق ہے، آرام کی غرض سے اسٹیڈیم نہیں آئے۔

ای سی بی کا مزید کہنا تھا کہ کھلاڑیوں کو وائرل انفیکشن ہوا ہے جو معمول کی بات ہے۔

دوسری جانب آج ہونے والی سیریز کی ٹرافی کی رونمائی کپتان بین اسٹوکس کی عدم دستیابی کی وجہ سے اب کل ٹاس سے پہلے کرنے کا فیصلہ کیا گیا ہے۔

اس سے قبل سوشل میڈیا پر جاری بیان میں پی سی بی کا کہنا تھا کہ انگلش کھلاڑیوں کے انفیکشن میں مبتلا ہونے کے بعد پنڈی ٹیسٹ شروع کرنے کے حوالے سے انگلش بورڈ کے ساتھ رابطے میں ہیں۔

The PCB and ECB are in discussions regarding the commencement of the 1st #PAKvENG Test as some England players are down with viral infection. The PCB continues to monitor the situation, is in contact with the ECB and will provide further updates in due course.

— Pakistan Cricket (@TheRealPCB) November 30, 2022

انہوں نے کہا کہ ہم صورت حال کو مانیٹر کر رہے ہیں، پی سی بی معاملے پر جلد اپ ڈیٹ جاری کر دے گا۔

واضح رہے کہ انگلش کپتان بین اسٹوکس سمیت 8 کھلاڑیوں میں بدہضمی کی شکایات سامنے آئی ہیں جب کہ یہاں ہم آپ کو بتاتے چلیں کہ دورہ پاکستان کے لیے انگلش ٹیم اپنا شیف ساتھ لائی ہے جو ان کے کھانے کے معیار کی نگرانی کررہے ہیں۔

یاد رہے کہ پاکستان اور انگلینڈ کے درمیان ٹیسٹ سیریز کا آغاز کل سے ہونے جارہا ہے جب کہ اس دوران تین ٹیسٹ میچز کھیلے جائیں گے۔

 پہلا ٹیسٹ یکم تا 5 دسمبر کے دوران راولپنڈی، دوسرا 9 تا 13 دسمبر کے دوران ملتان اور تیسرا 17 تا 21 دسمبر کراچی میں کھیلا جائے گا۔