قومی کرکٹ ٹیم کے کپتان بابر اعظم نے سابق کپتان اظہر علی کے مستقبل کے لیے نیک تمناؤں کا اظہار کیا ہے۔

بابر اعظم کا سابق کپتان اظہر علی کے ریٹائرمنٹ کے اعلان پر کہنا ہے کہ ’اظہر علی سے بہت کچھ سیکھنے کا موقع ملا ہے، ان کے مستقبل کے لیے نیک تمنائیں‘۔

پاکستان کرکٹ ٹیم کے کپتان بابر اعظم کا کراچی ٹیسٹ پر میڈیا سے گفتگو کرتے ہوئے کہنا تھا کہ جیسی کرکٹ کھیلتے آئے ہیں ویسے ہی کھیلنے کا پلان ہے۔

انہوں نے کہا کہ کل کے میچ میں امام الحق کو ریسٹ دیں گے، اظہر علی کھیلے گے یا نہیں یہ طے نہیں کیا ہے۔

ان کا کہنا تھا کہ ایک کے بعد ایک میچ کھیلنے کی وجہ سے آرام نہیں ملا، امید کرتے ہیں جو دو میچ اچھے نہیں رہے اس کی جگہ تیسرا میچ اچھا کھیلیں۔

کپتان کہتے ہیں غلطیوں سے سیکھنے کا موقع ملتا رہتا ہے، کوشش کررہے ہیں غلطی نہ دہرائیں۔

انہوں نے مزید کہا کہ کراچی کی وکٹ اسپن کے لیے سازگار لگ رہی ہے، کوشش کریں گے کہ میچ میں کامیابی حاصل کریں۔ کراچی کا موسم تھوڑا گرم ہے لہذا موسم اثر کرسکتا ہے۔

واضح رہے کہ سابق کپتان اظہر علی نے پریس کانفرنس کرتے ہوئے ٹیسٹ کرکٹ سے ریٹائرمنٹ کا اعلان کردیا ہے جب کہ اس دوران وہ آبدیدہ ہوگئے۔

انہوں نے کہا کہ کل کا میچ پاکستان کے لیے میرا آخری  میچ ہوگا، پاکستان کے لیے کھیلنا اور کپتانی کرنا میرے لیے بڑا اعزاز ہے۔  تمام مداحوں، اہل خانہ اور ٹیم میں لانے والوں کا بہت شکریہ۔

خیال رہے کہ کل سے کراچی میں پاکستان اور انگلینڈ کی ٹیموں کے درمیان تیسرے ٹیسٹ میچ کا آغاز ہونے جارہا ہے جو 21 دسمبر تک جاری رہے گا جب کہ سیریز میں انگلینڈ کو 2-0 کی فیصلہ کن برتری حاصل ہے۔