قومی کرکٹ ٹیم کے مڈل آرڈر بیٹر سعود شکیل کہتے ہیں انگلینڈ کو جلد آؤٹ کرنے کی کوشش کریں گے، ہم ٹارگٹ کا تعاقب کریں گے اور جیتیں گے۔

پاکستان کرکٹ ٹیم کے مڈل آرڈر بیٹر سعود شکیل نے آج ملتان ٹیسٹ کے دوسرے دن کے کھیل کے اختتام پر پریس کانفرنس کی۔

پریس کانفرنس کے دوران سعود شکیل کا کہنا تھا کہ میں کریز سے باہر نکل کر ہی کھیل رہا تھا، محمد رضوان کے رنز نہ کرنے کی وجہ سے دباؤ نہیں تھا۔

انہوں نے کہا کہ کوشش ہوگی کہ جو غلطی ہوئی وہ آئندہ نہ ہو، آج ایک دو آؤٹ ایسے ہوئے جس کی وجہ سے پوزیشن خراب ہوئی۔

ان کا کہنا تھا کہ پچ تھوڑا سلو ہوگئی ہے اس لیے اسپن سلو ہو رہی ہے، انگلینڈ کو جلد آؤٹ کرنے کی کوشش کریں گے، ہم ٹارگٹ کا تعاقب کریں گے اور جیتیں گے۔

انہوں نے مزید کہا کہ ایسا نہیں ہے کہ ہم ہدف کا تعاقب نہیں کرسکتے، ہم نے ماضی میں ہدف حاصل کیے ہیں جب کہ انگلینڈ کا اپنا کھیلنے کا ایک انداز ہے۔

واضح رہے کہ پاکستان اور انگلینڈ کے درمیان ملتان میں دوسرا ٹیسٹ جاری ہے جس کی پہلی اننگز میں انگلینڈ نے 281 رنز اسکور کیے جب کہ پاکستان کی ٹیم اپنی پہلی اننگز میں 202 رنز پر ہی ڈھیر ہوگئی۔

دوسری اننگز کا آغاز انگلینڈ نے 79 رنز کی برتری سے کیا اور دن کے اختتام تک 5 وکٹوں کے نقصان پر 202 رنز بنالیے جب کہ انگلینڈ کو مجموعی طور پر 281 رنز کی برتری حاصل ہے۔