قومی کرکٹ ٹیم کے کوچنگ اسٹاف میں تبدیلیوں سے متعلق اہم خبر سامنے آگئی۔

پاکستان کرکٹ بورڈ(پی سی بی) کے ذرائع کے مطابق مکی آرتھر نے کاؤنٹی ٹیم کی کوچنگ مصروفیات کے باعث پاکستان کرکٹ بورڈ سے وقت مانگ لیا ہے جبکہ بولنگ کوچ کے لیے عمر گل مضبوط امیدوار ہیں۔

پی سی بی ذرائع کا کہنا ہے کہ مکی آرتھر کی چند ہفتوں میں پاکستان آمد بھی متوقع ہے۔

مزید پڑھیں: ایشین کرکٹ کونسل کا نجم سیٹھی کے بیان پر ردعمل

 مکی آرتھر کا انگلش کاؤنٹی ڈربی شائر کے ساتھ تین سال  کا معاہدہ ہے۔ مکی آرتھر کاؤنٹی کے ساتھ معاملات طے کرنے کے بعد پی سی بی کو جواب دیں گے۔ مکی آرتھر نے انہی معاملات کی وجہ سے وقت مانگا ہے۔

قومی ٹیم کے موجودہ ہیڈکوچ ثقلین مشتاق کی نیوزی لینڈ کے خلاف سیریز آخری اسائنمنٹ ہے۔ ثقلین مشتاق اور  بولنگ کوچ شان ٹیٹ کا معاہدہ 9 فروری کو ختم ہوجائے گا۔

پی سی بی مکی آرتھر کو پاکستان ٹیم کا ہیڈکوچ بنانے کا خواہشمند ہے جبکہ فاسٹ بولنگ کوچ کے لیے ’گل ڈوزر‘ کے نام سے مشہور سابق ٹی ٹوئنٹی اسپیشلسٹ عمر گل مضبوط امیدوار ہیں۔

مزید پڑھیں: آئی سی سی فیصلے کیخلاف پی سی بی کی اپیل

قومی کرکٹ ٹیم کے عبوری چیف سلیکٹر  شاہد آفریدی نے بھی عمر گل کا نام تجویز کیا ہے۔

پاکستان ٹیم کی اگلی اسائنمنٹ اپریل مئی میں ہوم گراؤنڈز پر نیوزی لینڈ کے خلاف وائٹ بال سیریز ہے۔

ذرائع کا کہنا ہے کہ پاکستان کرکٹ بورڈ پی ایس ایل کے بعد اور نیوزی لینڈ سیریز سے قبل طویل المدتی تقرریاں کر لے گا۔