کراچی میں کھیلے جانے والے پی ایس ایل 8 کے میچز کے حوالے سے سیکیورٹی کوآرڈینیشن اجلاس منعقد ہوا۔

سیکیورٹی کوآرڈینیشن اجلاس ایس ایس یو ہیڈ کوارٹرزمیں ڈی آئی جی سیکیورٹی ڈاکٹر مقصود احمد کی صدارت میں ہوا جس میں ایونٹ کے آغاز سے قبل سیکیورٹی انتظامات کا جائزہ لیا گیا۔

ایس پی ایس ایس یو اظہر مغل نے شرکاء کو سیکیورٹی انتظامات پر بریفنگ دی۔ سیکیورٹی ڈویژن کے اہلکار بشمول ایس ایس یو کمانڈوز، دیگر قانون نافذ کرنے والے ادارے کے اہلکاروں کے ہمراہ نیشنل اسٹیڈیم کراچی اور دیگر مقامات پر سیکیورٹی کے فرائض سر انجام دیں گے۔

ڈی آئی جی سیکیورٹی ڈاکٹر مقصود احمد کا کہنا ہے کہ ایونٹ کے پرامن انعقاد کو یقینی بنانے کے لیے تمام تروسائل کو بروئے کار لایا جائے گا جب کہ حساس مقامات پر ماہر نشانہ باز بھی تعینات کیے جائیں گے۔

ایس ایس پی سیکیورٹی II سید سلمان، ایس ایس پی عرفان بہادر، ایس ایس پی ایسٹ زبیر نذیر، ایس ایس پی اسپیشل برانچ عرفان مختیار بھٹو نے بھی اجلاس میں شرکت کی۔

علاوہ ازیں ایس پی مددگار 15 حفیظ الرحمان، ایس پی ایس ایس یو ڈاکٹر نجیب، ایس پی گلشن کامران خان، اسسٹنٹ کمشنر سول لائنزعبدالحنان، پاک فوج، رینجرز اور پی سی بی کے سینئر افسران سمیت تمام اسٹیک ہولڈرز نے اجلاس میں شرکت کی۔

واضح رہے کہ پی ایس ایل 8 کا آغاز 13 فروری سے ملتان میں ہوگا جب کہ 26 فروری تک ملتان اور کراچی میں میچز کھیلے جائیں گے۔ ایونٹ کے بقیہ میچز راولپنڈی اور لاہور میں 19 مارچ تک شیڈول ہیں۔