ٹیسٹ کرکٹر فواد عالم کی جانب سے پاکستان کرکٹ کو چھوڑنے کی خبروں کے بعد ردعمل سامنے آگیا ہے۔

کرک بز کی رپورٹ میں دعویٰ کیا گیا تھا کہ پاکستان کے ٹیسٹ کرکٹر فواد عالم نے قومی ٹیم کے ساتھ اپنے بین الاقوامی کیریئر کو الواع کہنے کا ارادہ کرکے اپنی توجہ امریکہ میں اپنے کیریئر کی جانب مبذول کروالی ہے۔

رپورٹ میں کہا گیا تھا کہ وہ مائنر لیگ کرکٹ ٹی ٹوئنٹی میں شکاگو کنگز مین کے لیے مقامی کھلاڑی کے طور ایک نیا کردار نبھانے کو تیار ہیں۔

یہ بھی پڑھیں: فواد عالم نے مستقبل کے حوالے سے اہم فیصلہ کرلیا

37 سالہ کھلاڑی کا کہنا تھا کہ انہوں نے ریٹائرمنٹ کے بارے میں کوئی منصوبہ طے نہیں کیا ہے اور گردش کرنے والی افواہیں بے بنیاد ہیں۔

ان کا کہنا تھا کہ میں ابھی تک کسی فیصلے پر نہیں پہنچا ہوں، نہ تو میں نے پاکستان کرکٹ سے علیحدگی اختیار کی ہے اور نہ ہی ریٹائر ہونے کا فیصلہ کیا ہے۔

انہوں نے کہا کہ میں ڈومیسٹک کرکٹ شرکت کے لیے پرعزم ہوں جس کا مقصد آنے والے دو سالوں میں کرکٹ کھیلنا اور اپنے پیشہ ورانہ سفر کو طویل بنانا ہے۔

واضح رہے کہ فواد عالم نے گزشتہ سال آسٹریلیا کے خلاف تین ٹیسٹ میچز کی سیریز کھیلی تھی جس میں انہوں نے 4 اننگز کھیل کر 33 رنز بنائے تھے۔

انہوں نے سری لنکا کے خلاف واحد ٹیسٹ میچ میں حصہ لیا تھا جس کے بعد انہیں ٹیسٹ اسکواڈ سے باہر کردیا گیا تھا جب کہ اس میچ میں انہوں نے 25 رنز بنائے تھے۔

اگرچہ فواد عالم نے اپنے ٹیسٹ سفر کا آغاز 2009 میں سری لنکا کے خلاف سنچری سے کیا تھا لیکن بعد ازاں انہیں دو ٹیسٹ میچز کے بعد ہی پاکستانی اسکواڈ سے باہر کردیا گیا تھا۔

ایک دہائی سے زائد عرصے بعد قومی کھلاڑی نے بالآخر 2020 میں پاکستان کے دورہ انگلینڈ کے دوران قومی ٹیم میں واپسی کی۔

ٹیسٹ کریئر کے دوران انہوں نے 19 ٹیسٹ میچز کھیلے جس میں 38.88 کی اوسط کے ساتھ فواد عالم نے پانچ سنچریوں اور دو نصف سنچریوں کی بدولت 1011 رنز بنائے ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں